Tarmoqlarda Oliy sudda kadrlar almashinuvlari ro‘y berayotgani, jumladan uch nafar sudyaning arizasi olingani va murojaatlar bilan ishlash boshqarmasining barcha xodimlari yoppasiga ishdan bo‘shatilgani haqida xabar tarqaldi.
Holat yuzasidan “Daryo” muxbiri Oliy sud axborot xizmati rahbari Aziz Obidov bilan bog‘lanib, izoh oldi.
“Tarqalgan xabarlar haqiqatga to‘g‘ri kelmaydi. Butun boshli boshqarma xodimlari ishdan olingani yo‘q. Oliy sudning 11 nafar xodimi, ya’ni sudya yordamchisi va boshqa vazifalarda xizmat qilgan ishchilar Sudyalar oliy maktabiga imtihon topshirib, kirdi. Tabiiyki, ular o‘qishga kirgani bois mehnat shartnomasi bekor qilingan”, – dedi Oliy sud vakili.Uning qo‘shimcha qilishicha, Oliy suddagi sudyalarni tayinlash va ularni vakolatini tugatish Oliy sud vakolatiga kirmaydi.
Eslatib o‘tamiz, avgust oyi boshida Baxtiyor Islomov Oliy sud raisi etib saylangandi. Uning o‘rnida ishlab kelgan Kozim Komilov salomatligi tufayli o‘z xohishi bilan Oliy sudi raisi lavozimidan ozod etilgan. U Konstitutsiyaviy sud sudyasi lavozimiga saylangan edi.
Izoh (0)