Qashqadaryolik tadbirkorni haqoratlab, “prokuror laychasi va cho‘ntagi” degan “zamprokuror” javobgar qilindi. Ammo u ayblagan biznesmen hamon ichkarida qolmoqda

Qashqadaryo viloyatining Dehqonobod tumanida kavrak shirasi va danagini eksport qilish bilan shug‘ullanib kelgan tadbirkor ekologiyaga zarar yetkazish, shuningdek, afg‘on fuqarosidan 53 ming dollar pulni olib, vaqtida mahsulot yetkazib bermaganlikda pullarni o‘z manfaati yo‘lida sarflab yuborishda gumonlanib, qamoqqa olingan. Bu haqda “Daryo”ga tadbirkorning yaqinlari ma’lum qildi. 

Aniqlik kiritilishicha, Dehqonobod tumanidagi “Iso Muhammad Nur” MCHJ rahbari Nurjahon Egamshukurov 2023-yilning iyun-iyul oylarida tuman hokimligi zahirasidagi yer fondiga qarashli yerda tabiiy holda o‘sgan 753 tup tojik kavragi shirasini olib, ularning nobud bo‘lishiga sababchi sifatida ko‘rilgan. Va natijada tabiatga 372 million so‘m zarar keltirganlikda ayblangan.

Shuningdek, tadbirkor afg‘on fuqarosidan 53 ming dollar pul olib, evaziga 300 kg tojik kavragi donagini yetkazib berishni va’da qilganlikda, biroq va’dasida turmay, afg‘on fuqarosiga tegishli pulni o‘z manfaati yo‘lida sarflab yuborib, firibgarlik qilishda gumonlangan. Shu sabab tadbirkorga 2024-yilning 30-oktyabr kuni Jinoyat kodeksining tegishli moddalari bilan jinoyat ishi qo‘zg‘atilib, ayblov e’lon qilingan.

Toshkent shahar prokurori tadbirkorga nisbatan qamoqqa olish tarzidagi ehtiyot chorasini so‘ragach, 2024-yilning 31-oktyabr kuni Yashnobod tuman sudi yopiq sud majlisida buni ko‘rib chiqib, Toshkent shahar prokurorining iltimosnomasini qanoatlantirgan va tadbirkorga qamoqqa olish tarzidagi ehtiyot chorasini qo‘llagan. 

Zarar keltirding deya jinoyat ishi qo‘zg‘atishdi. Aytilgan zararning barchasi, jumladan ekologiyaga keltirilgan 372 million so‘mlik va afg‘on fuqarosidan olib yeb ketding degan pul ham to‘lab berildi. Qoplandi. Garcha aybi hali isbotlanmasa-da. Lekin bu ishni tergov qilgan prokuror o‘rinbosarining advokati sababmi Nurjahon haliyam ichkarida qolyapti. Unga nisbatan qo‘llanilgan qamoq ehtiyot chorasi bekor qilinmadi, deydi tadbirkorning yaqinlari. 

Dehqonobod tumanida kavrak shirasi va donagini yig‘ib olib, uni sotish orqali tadbirkorlik qilgan Nurjahon Egamshukurovni davlatga 372 million so‘m zarar yetkazishda ayblagan Boysun prokurori o‘rinbosari Namoz Avazov telefon orqali so‘zlashuvlarda qashqadaryolik mansabdorlarni korrupsioner deb atadi, shuningdek, sudlarni haqorat qilgan. 

Qashqadaryo gala korrupsioner ekan-ku. Hamma tarafni enasinikiga tiqqan prokuror ekan. Hali o‘ziga ham chiqaman. Ertaga inspeksiyaga xat ham qilib beraman ustidan. Javobini beradi, deydi tadbirkor ishini tergov qilayotgan prokuror o‘rinbosari. 

Nurjahon Egamshukurovning yaqinlariga ko‘ra, Boysun prokurori o‘rinbosarining telefon muloqotlari orqali aytgan bu gaplari, shuningdek tadbirkorni “prokurorning laychasi va kissasi”, deb atagan holati Jinoyat ishlari bo‘yicha Termiz shahar sudida ko‘rib chiqilgan. Prokuror o‘rinbosari tuhmat va haqorat qilishda ayblanib, 6 million 800 ming so‘m miqdorida jarimaga tortilgan.