Ijtimoiy himoya milliy agentligi Toshkentda nogironligi bo‘lgan shaxslar uchun “Ijtimoiy taksi” pilot loyihasi ishga tushganini e’lon qildi.
Ushbu loyiha aholining ijtimoiy himoyaga muhtoj qatlamlarini qo‘llab-quvvatlash, jumladan, nogironligi bo‘lgan shaxslar va tayanch harakatida muammolari bo‘lgan bolalar uchun ijtimoiy soha obyektlari, ta’lim muassasalariga borib kelishiga qulayliklar yaratish maqsadida yo‘lga qo‘yildi.
Ijtimoiy taksi xizmatiga qanday buyurtma beriladi?
Xizmatdan foydalanish Yandex Go ilovasi orqali amalga oshiriladi. Mazkur ilovada nogironligi bo‘lgan shaxslarning ehtiyojlariga moslashtirilgan maxsus funksiya Yandex Go ilovasida alohida ekranda mavjud. Ularni har qanday tarifda manzilga yetib olish uchun tanlash mumkin (Start, Komfort yoki Komfort+). Barcha tariflarda xizmat narxlari o‘zgarmaydi.
Buyurtmani qabul qilgan haydovchiga mijozni manzilga olib borish davomida quyidagi maxsus vazifalarni amalga oshirish kerakligi haqida xabar beriladi, masalan:
- mashina topishga yordam bering manzil kartochkasida foydalanuvchiga mashinani topish, uning yoniga kelish va salonga o‘tirishga yordam beruvchi izoh ko‘rinadi;
- eshitishida muammolari bo‘lgan shaxslarga haydovchi chat orqali muloqot qilishni so‘rashi kerak bo‘ladi;
- “nogironlik aravachasidaman” bu funksiya tanlangan bo‘lsa, haydovchida “nogironlar aravachasida bo‘laman, mashinaga o‘tirishda yordam, bo‘sh yukxona kerak” izohi ko‘rinadi.
“Nabiramning harakatlanishida muammosi bor, har kuni taksi xizmatidan foydalanamiz. Endilikda nabiramni ijtimoiy taksida bemalol ixtisoslashtirilgan maktabgacha ta’lim tashkilotining “G‘amxo‘rlik” guruhiga olib bormoqdaman. Narxlari ham arzon. Xizmatdan juda ham mamnunman. Ushbu xizmat nogironligi bo‘lgan shaxslar uchun qulay va moslashtirilgan”, deydi xizmatdan foydalanayotgan ayol.
Agentlik “Ijtimoiy taksi” pilot loyihasi amalga oshirilishi haqida 2024-yilning mart oyida ma’lum qilgandi. Ushbu pilot loyihani Toshkentdan tashqari Sirdaryo viloyatida ham yo‘lga qo‘yish ko‘zda tutilgandi.
Izoh (0)