AQSH Xalqaro taraqqiyot agentligi (USAID) O‘zbekistonda besh yilga mo‘ljallangan “Barcha bolalar muvaffaqiyatli” loyihasini ishga tushirdi. Bu haqda mamlakatning O‘zbekistondagi elchixonasi matbuot xizmati xabar berdi.
Qayd etilishicha, USAID’ning “Barcha bolalar muvaffaqiyatli” loyihasi inklyuziv taʼlim bilan bog‘liq uchta muhim yo‘nalishni qo‘llab-quvvatlaydi: inklyuziv taʼlim uchun qulay o‘quv-metodik materiallar, o‘qituvchilar uchun amaliyot va maktab muhitini yaratish, shu bilan birga asosiy manfaatdor tomonlar, yaʼni o‘qituvchilar va nogironligi bo‘lgan shaxslar bilan birgalikda ishlab chiqilgan barqaror siyosatni rivojlantirish.
USAID besh yil davomida “Barcha bolalar muvaffaqiyati” loyihasiga 25 million dollar ajratishni rejalashtirmoqda. Loyiha Creative Associates International hamda Xalqaro taʼlim bo‘yicha Amerika kengashlari, AQSHning Sirakuz universiteti qoshidagi nogironlik va inklyuziya markazi, Praxis Plus va “Yuksalish” umummilliy harakati bilan hamkorlikda amalga oshiriladi.
Barcha bolalar muvaffaqiyati” loyihasi rahbari Keyt Lephemga ko‘ra, loyiha dastlab Namangan va Sirdaryo viloyatlarida tajriba-sinov tariqasida amalga oshiriladi. Har bir pilot hududdan 3 tadan bog‘cha va 3 tadan maktab tanlab olinadi.
Shuningdek, loyihaning ishga tushirilishi munosabati bilan tashkil etilgan tadbir yakunida Creative Associates International, O‘zbekiston prezidenti huzuridagi Ijtimoiy himoya milliy agentligi, Maktabgacha va maktab taʼlimi vazirligi, Oliy taʼlim, fan va innovatsiyalar vazirliklari tomonidan sifatli inklyuziv taʼlimni tashkil etish va O‘zbekistondagi barcha bolalarni ijtimoiy qo‘llab-quvvatlash borasida hamkorlikda ish olib borish nazarda tutilgan Hamkorlik kelishuvi imzolangan.
Bundan oldin USAID’ning O‘zbekistondagi missiyasiga yangi rahbar tayinlangani, USAID Toshkentda ekologik g‘oyalar bo‘yicha talabalar tanlovi g‘oliblarini taqdirlagani, AQSH xalqaro taraqqiyot agentligi O‘zbekistonga 131 tonna oziq-ovqat yordami yetkazib bergani ma’lum qilingandi.
Izoh (0)