Qashqadaryoda parvarishga muhtoj, yolg‘iz keksa va nogironligi bo‘lgan shaxslar chuqurlashtirilgan tibbiy ko‘rikdan o‘tkaziladi

Qashqadaryo viloyatida o‘zgalar parvarishiga muhtoj bo‘lgan yolg‘iz yashovchi keksalar va nogironligi bo‘lgan shaxslar chuqurlashtirilgan tibbiy ko‘rikdan o‘tkaziladi. Mazkur tibbiy ko‘riklar “Inson” ijtimoiy xizmatlar markazlari tomonidan tasdiqlangan jadval asosida amalga oshiriladi. Bu haqda “Daryo”ga Ijtimoiy himoya milliy agentligi Qashqadaryo viloyati boshqarmasi axborot xizmati rahbari Dilshod Shodiyev xabar berdi. 

Qayd etilishicha, chuqurlashtirilgan tibbiy ko‘riklar endilikda bir yilda kamida bir marotaba o‘tkazilishi rejalashtirilgan.

“Inson” ijtimoiy xizmatlar markazlari xodimlarga fuqarolardan kam ta’minlangan oilalar bolalari uchun nafaqa va moddiy yordam tayinlash bo‘yicha arizalarni qabul qilish vakolati ham beriladi. Shu va shunga o‘xshash ijtimoiy xizmat masalalari yuzasidan fuqarolar yashash manzilidagi mahalla fuqarolar yig‘iniga yoki tuman (shahar) “Inson” ijtimoiy xizmatlar markazlariga murojaat qilishi mumkin bo‘ladi, — deydi Dilshod Shodiyev.

Boshqarma axborot xizmati shuningdek, fuqarolar uchun viloyatdagi barcha tuman(shahar)larning “Inson” ijtimoiy xizmatlar markazlari manzillarini ma’lum qilgan.