Oliy Majlis Senati raisi Tanzila Norboyeva hamda Ijtimoiy himoya milliy agentligi direktorining birinchi o‘rinbosari Shahnoza Mirziyoyeva 13-sentyabr kuni AQSH prezidentining nogironlarning xalqaro huquqlari bo‘yicha maxsus maslahatchisi Sara Minakara bilan uchrashuv o‘tkazdi. Bu haqda agentlik matbuot xizmati xabar berdi.
Uchrashuvda nogironligi bo‘lgan shaxslar uchun ijtimoiy shart-sharoitlarni yaxshilash va bu boradagi ishlarni xalqaro standartlar asosida tashkil etish bo‘yicha hamkorlikdagi rejalarga eʼtibor qaratildi.
Muloqotda prezident boshchiligida O‘zbekistonda amalga oshirilayotgan barcha sohalardagi islohotlar “Inson qadri uchun” degan ezgu tamoyil asosida tashkil etayotgani alohida taʼkidlandi. Bu boradagi ishlar Sara Minakara tomonidan ham eʼtirof etildi.
Uchrashuvda tomonlar O‘zbekistonda inklyuziv jamiyatni rivojlantirish va nogironligi bor shaxslarning barcha sohalardagi faolligini oshirishga doir chora-tadbirlarni muhokama qildi.
Shuningdek, nogironlikni oldindan aniqlash hamda korreksiya qilish, tibbiy modeldan inklyuziv modelga o‘tish va sifat darajasini xalqaro standartlarga moslashtirish masalalari ko‘rib chiqildi.
Shu bilan birga, imkoniyati cheklangan shaxslar uchun maqbul muhitni yaratish, jamiyatda mavjud stereotiplarni bartaraf etish hamda bu borada davlat va nodavlat tashkilotlarining vazifalari xususida fikr almashildi.
Izoh (0)