Qirg‘izistonda korrupsion jinoyatlar uchun sudlangan shaxslarga yuqori davlat lavozimlarida ishlashni umrbodga taqiqlash taklif qilindi. Tegishli qonun loyihasi Jogorku Keneshda taqdim etildi. Bu haqda 24.kg xabar berdi.
Hujjatni deputat Jenishbek Toktorbayev ishlab chiqqan, u davlat va mahalliy boshqaruv organlarida korrupsiyaga qarshi kurashni kuchaytirishni nazarda tutadi. Loyihaga ko‘ra, korrupsioner fuqarolar sudlanganligi olib tashlangan yoki tashlanmaganidan qat’i nazar, prezident, parlament deputati yoki vazirlar mahkamasi a’zosi lavozimlarini egallash huquqiga ega bo‘lmaydi.
Toktorbayev qabul qilingan choralarga qaramay, davlat organlarida korrupsiya darajasi hamon yuqori ekanini aytgan. Umrbod taqiq davlat apparatini “vijdonsiz amaldorlardan tozalash” va ularning keyingi korrupsion faoliyatining oldini olishga qaratilgan.
Qonun loyihasi “Prezident va Jogorku Kenesh deputatlari saylovi to‘g‘risida”gi hamda “Vazirlar Mahkamasi to‘g‘risida”gi konstitutsiyaviy qonunlarga o‘zgartishlar kiritishni taklif etmoqda.
O‘zbekistonda bu borada vaziyat qanday?
O‘zbekistonda 2023-yilda korrupsiya jinoyati uchun sudlangan 566 nafar shaxs davlat xizmatiga qayta ishga kirgan va korrupsiya jinoyatlarini takror sodir etgan. Hozirda Antikorrupsiya agentligi korrupsionerlar reyestrini yaratish ustida ish olib bormoqda. Qonun loyihasi 2022-yil boshida ishlab chiqilgan bo‘lib, 2023-yilda boshqa vazirlik va idoralar tomonidan maʼqullangandi.
Prezidentning 2021-yilning 6-iyuldagi farmoni bilan 2022-yil 1-yanvardan boshlab “Korrupsiyaga oid jinoyatlarni sodir etishda aybdor deb topilgan shaxslarning ochiq elektron reyestri yuritilishi belgilangandi. Reyestrga kiritilgan shaxslarga quyidagilar taqiqlanadi:
- davlat xizmatiga qabul qilinishi va davlat mukofotlari bilan taqdirlanishi;
- saylanadigan va alohida tartibda tayinlanadigan lavozimlarga nomzodlarining ko‘rsatilishi;
- davlat organlari huzuridagi jamoatchilik kengashlari hamda idoralararo kollegial organlarning a’zoligiga kiritilishi;
- ularning tadbirkorligi davlat xaridlarida va davlat-xususiy sheriklik bitimida ishtirokchi (ijrochi) sifatida qatnashishi;
- davlat ulushi 50 foizdan yuqori bo‘lgan tashkilotlar hamda davlat ta’lim muassasalarida rahbarlik lavozimlarida faoliyat yuritishi.
Bundan avval O‘zbekistonda korrupsionerlar “qora ro‘yxati” shakllantirilishi va ushbu ro‘yxatga tushgan shaxslar qator huquqlardan mahrum etilishi haqida xabar berilgandi.
Izoh (0)