Қирғизистонда коррупцион жиноятлар учун судланган шахсларга юқори давлат лавозимларида ишлашни умрбодга тақиқлаш таклиф қилинди. Тегишли қонун лойиҳаси Жогорку Кенешда тақдим этилди. Бу ҳақда 24.kg хабар берди.
Ҳужжатни депутат Женишбек Токторбаев ишлаб чиққан, у давлат ва маҳаллий бошқарув органларида коррупцияга қарши курашни кучайтиришни назарда тутади. Лойиҳага кўра, коррупционeр фуқаролар судланганлиги олиб ташланган ёки ташланмаганидан қатъи назар, президент, парламент депутати ёки вазирлар маҳкамаси аъзоси лавозимларини эгаллаш ҳуқуқига эга бўлмайди.
Токторбаев қабул қилинган чораларга қарамай, давлат органларида коррупция даражаси ҳамон юқори эканини айтган. Умрбод тақиқ давлат аппаратини “виждонсиз амалдорлардан тозалаш” ва уларнинг кейинги коррупцион фаолиятининг олдини олишга қаратилган.
Қонун лойиҳаси “Президент ва Жогорку Кенеш депутатлари сайлови тўғрисида”ги ҳамда “Вазирлар Маҳкамаси тўғрисида”ги конституциявий қонунларга ўзгартишлар киритишни таклиф этмоқда.
Ўзбекистонда бу борада вазият қандай?
Ўзбекистонда 2023 йилда коррупция жинояти учун судланган 566 нафар шахс давлат хизматига қайта ишга кирган ва коррупция жиноятларини такрор содир этган. Ҳозирда Антикоррупция агентлиги коррупционeрлар реестрини яратиш устида иш олиб бормоқда. Қонун лойиҳаси 2022 йил бошида ишлаб чиқилган бўлиб, 2023 йилда бошқа вазирлик ва идоралар томонидан маъқулланганди.
Президентнинг 2021 йилнинг 6 июлдаги фармони билан 2022 йил 1 январдан бошлаб “Коррупцияга оид жиноятларни содир этишда айбдор деб топилган шахсларнинг очиқ электрон реестри юритилиши белгиланганди. Реестрга киритилган шахсларга қуйидагилар тақиқланади:
- давлат хизматига қабул қилиниши ва давлат мукофотлари билан тақдирланиши;
- сайланадиган ва алоҳида тартибда тайинланадиган лавозимларга номзодларининг кўрсатилиши;
- давлат органлари ҳузуридаги жамоатчилик кенгашлари ҳамда идоралараро коллегиал органларнинг аъзолигига киритилиши;
- уларнинг тадбиркорлиги давлат харидларида ва давлат-хусусий шериклик битимида иштирокчи (ижрочи) сифатида қатнашиши;
- давлат улуши 50 фоиздан юқори бўлган ташкилотлар ҳамда давлат таълим муассасаларида раҳбарлик лавозимларида фаолият юритиши.
Бундан аввал Ўзбекистонда коррупционeрлар “қора рўйхати” шакллантирилиши ва ушбу рўйхатга тушган шахслар қатор ҳуқуқлардан маҳрум этилиши ҳақида хабар берилганди.
Изоҳ (0)