Farg‘onadagi portlashdan so‘ng viloyat hududida faoliyat ko‘rsatayotgan barcha turdagi avtomobillarga yonilg‘i quyish shoxobchalarining belgilangan norma va me’yorlarga muvofiqligi holati o‘rganib chiqiladi. Bu haqda viloyat hokimining tegishli farmoyishi qabul qilindi.
Viloyat hokimligi matbuot xizmatining ma’lum qilishicha, baxtsiz va noxush hodisalarning oldini olish, xavfsizlik qoidalariga amal qilish, yo‘l qo‘yilgan kamchiliklarni bartaraf etish maqsadida “O‘zdavneftgazinspeksiya” Farg‘ona hududiy bo‘limi, viloyat favqulodda vaziyatlar boshqarmasi, “Hududgaz Farg‘ona” gaz ta’minoti filali kabi mas’ul tashkilotlar xodimlaridan iborat ishchi guruh tuzildi.
Mazkur ishchi guruh tomonidan avtomobillarga gaz to‘ldirish kompressor stansiyalari (AGTKS), avtomobillarga gaz quyish stansiyalari (AGQS) va avtomobillarga yonilg‘i quyish stansiyalari (AYQS)ning sanoat, yong‘in, ekologik xavfsizligi talablariga muvofiqligi, yonilg‘i saqlash rezervuar (sig‘im)larning holati va boshqa qonunchilikdagi me’yorlar o‘rganiladi. O‘rganishlar chog‘ida ularning moliyaviy ishlariga aralashilmaydi hamda shoxobchalar odatdagi ish tartibi bo‘yicha faoliyat ko‘rsatadi.
Shuningdek, viloyat hududida faoliyat yuritayotgan, tashkiliy huquqiy shaklidan qat’i nazar, barcha avtomobillarga yonilg‘i quyish, siqilgan va suyultirilgan gaz to‘ldirish shoxobchalarida ishlovchi ishchi-xodimlar viloyat favqulodda vaziyatlar boshqarmasi qoshidagi o‘quv markazida dastur asosida shartli ravishda o‘qitilishi ta’minlanadi.
Farg‘onadagi portlash va yong‘in
Farg‘ona shahar, “Yangiyo‘l” MFY, Ahmad Yassaviy ko‘chasida joylashgan, ko‘p yonilg‘ili AYQSH va AGQSH shoxobchasida portlash va yong‘in 17-dekabr kuni sodir bo‘lgandi. Suyultirilgan gaz to‘kish vaqtida texnologik jarayonlarning buzilishi hamda texnika xavfsizligi qoidalariga rioya qilinmasligi oqibatida chaqnash sodir bo‘lgan, undan so‘ng yong‘in yuzaga kelgan.
Yong‘in oqibatida dastlab bir nafar fuqaro vafot etgani, to‘rt nafar fuqaro tan jarohati olgan, sakkiz nafar fuqaro tibbiyot xodimlari nazoratida ekani ma’lum qilindi. Keyinroq yana 3 kishi shifoxonada vafot etdi.
Holat yuzasidan Jinoyat kodeksining 257-moddasi (mehnatni muhofaza qilish qoidalarini buzish) 3-qismi “a” bandi hamda 259-moddasi (yong‘in xavfsizligi qoidalarini buzish) 3-qismi “a” bandi bilan jinoyat ishi qo‘zg‘atilib, jinoyat ishi doirasida 5 kishi qamoqqa olindi.
Izoh (0)