Dog‘istonda Maxachqal’a chekkasida joylashgan Noviy Xushet qishlog‘ida joylashgan yoqilg‘i quyish shoxobchasida portlash sodir bo‘ldi. Hodisa oqibatida 13 kishi halok bo‘ldi, 23 kishi jarohat oldi.
Avvalroq Rossiya sog‘liqni saqlash vazirining yordamchisi Aleksey Kuznetsov sakkiz nafar jabrlanuvchi kasalxonaga yotqizilgani, ulardan birining ahvoli og‘ir ekanini ma’lum qilgandi.
Qayd etilishicha, yong‘in 500 kvadrat metr maydonni qamrab olgan. SHOT Telegram kanaliga ko‘ra, portlash epitsentriga yaqin joyda joylashgan yoqilg‘i quyish shoxobchasi oshxonasidan 14 kishi qutqarib olingan.
Voqea yuzasidan “xavfsizlik talablariga javob bermaganlik hamda ikki yoki undan ortiq kishining o‘limiga sabab bo‘lgan xizmatlar ko‘rsatish” moddasi bo‘yicha jinoyat ishi qo‘zg‘atilgan. Bunday jinoyat uchun maksimal yetti yil qamoq jazosi belgilanishi mumkin. SHOT nashrining yozishicha, portlash benzin yonishi natijasida sodir bo‘lgan. Boshqa manbalarda bu ma’lumot tasdiqlanmagan.
“Dog‘istonda 28-sentyabr portlash qurbonlari xotirasiga motam kuni deb e’lon qilindi”, deb xabar berdi respublika rahbari matbuot xizmati.
Izoh (0)