Фарғонадаги портлашдан сўнг вилоят ҳудудида фаолият кўрсатаётган барча турдаги автомобилларга ёнилғи қуйиш шохобчаларининг белгиланган норма ва меъёрларга мувофиқлиги ҳолати ўрганиб чиқилади. Бу ҳақда вилоят ҳокимининг тегишли фармойиши қабул қилинди.
Вилоят ҳокимлиги матбуот хизматининг маълум қилишича, бахтсиз ва нохуш ҳодисаларнинг олдини олиш, хавфсизлик қоидаларига амал қилиш, йўл қўйилган камчиликларни бартараф этиш мақсадида “Ўздавнефтгазинспекция” Фарғона ҳудудий бўлими, вилоят фавқулодда вазиятлар бошқармаси, “Ҳудудгаз Фарғона” газ таъминоти филали каби масъул ташкилотлар ходимларидан иборат ишчи гуруҳ тузилди.
Мазкур ишчи гуруҳ томонидан автомобилларга газ тўлдириш компрессор станциялари (АГТКС), автомобилларга газ қуйиш станциялари (АГҚС) ва автомобилларга ёнилғи қуйиш станциялари (АЁҚС)нинг саноат, ёнғин, экологик хавфсизлиги талабларига мувофиқлиги, ёнилғи сақлаш резервуар (сиғим)ларнинг ҳолати ва бошқа қонунчиликдаги меъёрлар ўрганилади. Ўрганишлар чоғида уларнинг молиявий ишларига аралашилмайди ҳамда шохобчалар одатдаги иш тартиби бўйича фаолият кўрсатади.
Шунингдек, вилоят ҳудудида фаолият юритаётган, ташкилий ҳуқуқий шаклидан қатъи назар, барча автомобилларга ёнилғи қуйиш, сиқилган ва суюлтирилган газ тўлдириш шохобчаларида ишловчи ишчи-ходимлар вилоят фавқулодда вазиятлар бошқармаси қошидаги ўқув марказида дастур асосида шартли равишда ўқитилиши таъминланади.
Фарғонадаги портлаш ва ёнғин
Фарғона шаҳар, “Янгийўл” МФЙ, Аҳмад Яссавий кўчасида жойлашган, кўп ёнилғили АЁҚШ ва АГҚШ шохобчасида портлаш ва ёнғин 17 декабрь куни содир бўлганди. Суюлтирилган газ тўкиш вақтида технологик жараёнларнинг бузилиши ҳамда техника хавфсизлиги қоидаларига риоя қилинмаслиги оқибатида чақнаш содир бўлган, ундан сўнг ёнғин юзага келган.
Ёнғин оқибатида дастлаб бир нафар фуқаро вафот этгани, тўрт нафар фуқаро тан жароҳати олган, саккиз нафар фуқаро тиббиёт ходимлари назоратида экани маълум қилинди. Кейинроқ яна 3 киши шифохонада вафот этди.
Ҳолат юзасидан Жиноят кодексининг 257-моддаси (меҳнатни муҳофаза қилиш қоидаларини бузиш) 3-қисми “а” банди ҳамда 259-моддаси (ёнғин хавфсизлиги қоидаларини бузиш) 3-қисми “а” банди билан жиноят иши қўзғатилиб, жиноят иши доирасида 5 киши қамоққа олинди.
Изоҳ (0)