Turkiyaning Sakarya viloyatida joylashgan fabrikada portlash sodir bo‘ldi. Bosh konsulxona axborot xizmati jarohatlanganlar orasida o‘zbekistonliklar yo‘qligini ma’lum qildi.
Keltirilishicha, 15-sentyabr kuni Sakaryaning Hendek tumanida joylashgan Oba makaron fabrikasida texnogen avariya natijasida portlash sodir bo‘lib, yong‘in yuzaga kelgan. Dastlabki ma’lumotlarga ko‘ra, portlash yem siloslari joylashgan hududda boshlangan. Fabrikada ishlagan 27 nafar ishchi jarohatlanib, ulardan 6 nafarining ahvoli og‘ir.
Voqea yuzasidan Hendek tuman prokuraturasi tomonidan surishtiruv boshlangan. Mazkur fojiada jabrlanganlar orasida O‘zbekiston fuqarolari aniqlanmagan.
Bundan avval O‘zbekistonlik 21 yoshli ayol ammasi taklifiga ko‘ra Istanbulga borib, ko‘chada qolib ketgani ma’lum bo‘lgandi. “Xalqaro o‘zbek sanoatchilari, tadbirkorlar va ilm insonlari jamiyati” a’zolari homiyligida aviachipta va boshqa to‘lovlari qoplandi. Yordam bergan barchaga ayol va konsulxona nomidan tashakkur bildirildi.
Shuningdek, Turkiyaning Istanbul shahrida o‘z qizi tomonidan qiyin ahvolda qoldirilgan ayol va uning o‘g‘li O‘zbekistonga qaytarilgani xabar qilingandi.
Izoh (0)