2024-yilning 5-dekabr kuni Toshkent viloyatidagi ishlab chiqarish korxonasi ma’muriy-xo‘jalik binosida gaz portlagani haqida xabar berilgan edi. Hodisa oqibatida 1 nafar fuqaro vafot etgan, 6 nafar fuqaro tan jarohati olib, shifoxonaga yotqizilgan.
Biroq ma’lum bo‘lishicha, korxona gaz tarmog‘iga ulanmagan, xonalar elektr pechlari orqali isitilgan. Xo‘sh, unda portlashga nima sabab bo‘lgan? “Daryo” muxbiri voqea joyida bo‘lib, tafsilotlarni o‘rgandi.
Mahallaning o‘ziga xos nomi
“Daryo” muxbiri hodisa tafsilotlarini o‘rganish maqsadida O‘rta Chirchiq tumanida bo‘ldi. Voqea tumanning “Kim Pen Xva” mahallasida sodir bo‘lgan.
O‘rganish davomida hududning o‘zgacha nomda ekanligi e’tiborimizni tortdi. O‘zbek, koreys, dungan va boshqa millatga mansub uch mingga yaqin fuqaro istiqomat qiluvchi mahalla nomi bir vaqtlar ushbu hududdagi shirkat xo‘jaligiga 35 yil raislik qilgan Kim Pen Xva nomiga qo‘yilgan.
Mahallada ta’lim muassasalari bilan bir qatorda o‘nlab katta va kichik ishlab chiqarish korxonalari mavjud ekan.
Portlash Qutb yulduzi ko‘chasida joylashgan quruq qurilish aralashmalari ishlab chiqaruvchi korxonada yuz bergan.
Hech narsadan xabari yo‘q qorovul
Korxonaga borganimizda darvoza qulf edi. Shunday bo‘lsa-da, kimdir bo‘lsa kerak degan umidda eshikni taqillatdim. Birozdan so‘ng yoshi oltmishdan o‘tgan otaxon chiqib, kim va nima kerakligini so‘radi. O‘zimni tanishtirib, maqsadimni aytganimdan so‘ng hech narsa demasdan darvozani qulflab, kirib ketdi. Shunday bo‘lsa-da, kimningdir kelishi yoki chiqishini kutishga qaror qildim.
Yarim soatlar o‘tgach, korxonadan Damas’da uch-to‘rt kishi chiqdi. Savol bergunimga qadar ketib qolishdi. Qorovul esa binoni qulflab, qayergadir ketishga shaylandi. Ortidan borarkanman, savollarimga javob olishga intildim.
“Men hech narsa bilmayman. Bilganim: kechqurun bu yerda ishchilar qoladi. O‘sha kuni uyda o‘tirsam, tashqarida nimadir portlagani eshitildi. Yugurib chiqdim. Qarasam, bizning korxonada portlash bo‘lgan ekan. Nima bo‘lganini bilmayman. Shuni ayta olaman, xolos. Qolganini rahbarlardan so‘rang. Ular yo prokuraturaga ketishgan yoki shifoxonada bo‘lishi mumkin”, dedi qorovul.
Gaz quvuri yer ostidan o‘tgan
O‘rganishlar davomida hodisa “Ultra Orgin Beton” mas’uliyati cheklangan jamiyatiga tegishli korxonada yuz bergani aniqlandi. Internetdagi mavjud ochiq ma’lumotlar orqali mas’ullar bilan bog‘lanildi.
Telefon orqali suhbatda o‘zini bino egasi deya tanishtirgan Bahriddin Raupovning aytishicha, hududga o‘n yildan buyon egalik qilib keladi. Shu muddat ichida hudud va uning atrofida gaz quvuri o‘tganidan bexabar bo‘lgan.
_page-0001.jpg)
“O‘n yildan buyon shu yerga egalik qilib kelaman. Bu joy ishlab chiqarishga mo‘ljallangan. To‘rt yildan oshdi bu yerdan “Ultra Orgin Beton” MCHJ (ochiq ma’lumotlarga ko‘ra, jamiyat ta’sischisi Raupovning o‘zi) ijara asosida foydalanib keladi. Jamiyat tomonidan quruq qurilish aralashmalari ishlab chiqariladi. Buning uchun gaz kerak emas, shu sababli korxona uchun gaz ulamaganmiz.
Ishchilar yotadigan xonada elektr isitkichlar va yuvinish uchun “ariston” bor edi. Boshqa hech narsa bo‘lmagan.
Bir vaqtlar bu yerda hammom bo‘lgan ekan. O‘shanda gaz yerosti quvuri orqali o‘tkazilgan. Bino hududidagi quvurlar foydalanilmagandan keyin chirib ketgan. Lekin asosiy quvurdan keluvchi joyi kesib tashlanmagan. Binoga 10-15 metr yaqinlikda bo‘lgan quvur teshilib, gaz sizib chiqqan. Yer tagida bo‘lganligi uchun gaz mavjud teshiklar orqali yo‘l topib, bino ichiga to‘planib qolgan. Bolalardan biri turib, elektrni yoqqanida portlagan.
Tumangaz idorasidagilar bu yerdan quvur o‘tganini yaxshi bilisharkan. Kecha kelishib, belgilangan joyni kovlashdi”, deydi Bahriddin Raupov.
Beton bosib qolgan ishchilar
Nurafshon shahar tibbiyot birlashmasining Qabul bo‘limiga borganimizda jarrohlik bo‘limiga tashrif buyurib, qabulxonaga jabrlanuvchilar bilan uchrashmoqchiligimizni aytganimda buning uchun bo‘lim boshlig‘i Ne’matjon Arslonovning ruxsati kerakligini bildirishdi.
“Kecha 6 nafar bemor olib kelingan, shundan to‘rt nafari ayni paytda bo‘limimizda davolanmoqda. 2 nafari Toshkent shahridagi shifoxonalarga o‘tkazilgan. Bemorlarimizning holati barqaror, asosan ko‘krak qafasida ozgina lat yeyish jarohatlari bor. Barcha tibbiy muolajalar ko‘rsatilyapti. Uch-to‘rt kundan so‘ng ruxsat beriladi”, deydi Ne’matjon Arslonov.
Bir soatlik kutishdan so‘ng bemorlar Oqil Xolboyev, Rashid Habibulin va Umidjon Isayevlar bilan uchrashib, savollarga javob olishga ruxsat olindi.
“Bu yerda og‘aynim va uning qarindoshi ishlaydi. O‘sha kuni tunda uchalamiz Surxondaryodan kelgandik. Yarim tunda yetib kelganimiz sababli shu yerda qolib, kun yorishi bilan Chotqolga ketishni reja qildim. Eng kechi o‘zim uxlaganman. Shunda ham hech qanday gaz hidi sezilmagan. Afsuski, ertalab ko‘zimni ochganimda shu holat yuz berib, bino qulab tushgan ekan. Yotoq o‘rnimiz ikki qavatli edi, men tepada yotardim. Pastda yotgan do‘stimning qarindoshi devor beton qulab tushishi oqibatida vafot etgan”, deydi Oqil Xolboyev.
“Oldin bir ishlab ketgan edim. Yana chaqirishganiga uch kun oldin kelgandim. Korxonada texnikalar holatiga qarab yuraman. Masofa uzoq bo‘lgani uchun ishni tugatgach, shu yerning o‘zida qolardik. Xonani isitish uchun elektr pechka yoqib qo‘yiladi. Shu kungacha tabiiy gaz borligidan bexabar edim. Chunki ovqat ham tashqarida o‘choqda qilinardi.
Voqea yuz bergan kuni uxlab yotgan edik, birdan portlagan ovoz eshitildi. Ko‘zimni ochib qarasam, oyog‘im ustida bir kishi yotibdi, atrofni ko‘rib bo‘lmaydi. Anchadan keyin qorovul kelib, hammamizga yordam berdi”, deydi Rashid Habibulin.
“Portlashdan keyin o‘zimga kelganimda nimagadir qisilib qolganimni his qildim. Ko‘zimni ochsam, beton orasiga qisilib qolgan ekanman. Bino qulab tushgan ekan. Xonada uch kishi yotgandik, barchamizning holatimiz yaxshi. Lekin qo‘shni xonadagi bolalarning bittasi ustiga beton tushishi oqibatida vafot etibdi”, deydi Umidjon Isayev.
Toshkent viloyati favqulodda vaziyatlar boshqarmasi axborot xizmati rahbari Rustam Alimovning aytishicha, holat yuzasidan viloyat ichki ishlar bosh boshqarmasi va prokuraturasi tomonidan o‘rganishlar olib borilmoqda.
Voqea yuz berganiga bir hafta bo‘ldi. Afsuski, portlash sabablarini o‘rganish yakunlari yuzasidan haligacha tegishli idoralar tomonidan qo‘shimcha ma’lumotlar berilmadi.
Izoh (0)