AQSH prezidenti Donald Tramp agar Eron yangi yadroviy obyektlar quradigan bo‘lsa, ular yo‘q qilinishini aytdi. U bu haqda o‘zining Truth Social ijtimoiy tarmog‘ida yozdi.
Erondagi uchta yadro obyektining barchasi butunlay vayron etilgan va/yoki yo‘q qilingan. Ularni qayta ishga tushirish uchun yillar talab etiladi. Agar Eron buni xohlasa ham, unga bu obyektlarni tiklashdan ko‘ra, uchta joyda yangidan qurishi afzal bo‘lardi, chunki ular yana yo‘q qilinadi, deb yozgan Tramp.
Eron “Yadro qurolini tarqatmaslik to‘g‘risidagi” shartnomadan chiqishi va uranni 60 foizdan yuqori darajada boyitishni boshlashi mumkin. Mamlakat parlamentning milliy xavfsizlik va tashqi siyosat qo‘mitasi a’zosi Ibrohim Rizoiy buni tasdiqlagan. U tashqi bosim kuchaygan taqdirda Tehron shunday qadam tashlashini aytgan.
Rizoiyga ko‘ra, hozirgacha Eron o‘z yadroviy imkoniyatlarini to‘liq ishga solmagan, ammo zamonaviy sentrifugalar ishlab chiqarish va yadroviy hamkorlikni kengaytirish kabi “boshqa strategik choralar”ni qo‘llashi mumkin.
Isroil 13-iyundan boshlab Eronga tinimsiz hujum qilib, uning yadroviy obyektlari, mudofaa tizimlari, yuqori martabali harbiy amaldorlari va yadrochi olimlarini nishonga oldi.
AQSHning urushdagi ishtiroki
22-iyun kuni AQSH Isroilning harakatlariga qo‘shilib, uchta asosiy obyektga — Fordo, Natanz va Isfahonga aviazarbalar berdi. Hujumda bunker bombalardan ham foydalanildi. Markaziy razvedka boshqarmasi boshlig‘i Jon Retkliff operatsiya Eron yadroviy dasturiga jiddiy zarar yetkazganini ma’lum qildi. Zarbalardan ko‘p o‘tmay AQSH prezidenti Donald Tramp Eron va Isroil o‘rtasida o‘t ochishni to‘xtatish rejimi kuchga kirganini e’lon qildi, buni ikkala tomon ham tasdiqladi.
Izoh (0)