Tehron 14-iyul kuni BMT Xavfsizlik kengashi Eronga sanksiya joriy etsa, bunga yarasha javob qaytarilishini ma’lum qildi. Bu haqda Fox News xabar berdi.
BMT Tehronning yadroviy harakatlarini cheklash maqsadida Eronga keng ko‘lamli sanksiyalar joriy etishni rejalashtirmoqda. Eron TIVning rasmiy vakili Ismoil Bag‘oiy matbuot anjumanida BMT tomonidan qo‘llanadigan sanksiyalarga “tegishlicha javob qaytarilishini” ta’kidlagan.
“Eronga sanksiya kiritish tahdidi huquqiy va siyosiy asosga ega emas. Bunga Eron Islom Respublikasi munosib va mutanosib javob qaytaradi”, dedi u.
Bag‘oiy Tehronning qanday javob qaytarishi haqida batafsil ma’lumot bermagan. So‘nggi kunlarda BMT xavfsizlik ekspertlari 18-oktyabrgacha mamlakatga sanksiya joriy etish bilan tahdid qilayotgandi.
Tashkilot yaqin kunlarda “Qo‘shma keng qamrovli harakatlar rejasining 10 yilligi”ga bag‘ishlab anjuman o‘tkazishni rejalashtirgan. Aynan shu yig‘ilishda Eronga qarshi sanskiyalar joriy etilishi haqida taxminlar bor edi. Tehron hukumati aynan shu farazlar sabab sanksiyalarga javob qaytarishini ma’lum qilgan. Qo‘shma keng qamrovli harakatlar rejasiga ko‘ra, agar Eron kelishuv shartlarini buzgani aniqlansa, bir tomonlama tartibda tezkor sanksiyalar joriy etilishi mumkin.
Ta’kidlanishicha, Eronning sanksiyalarga ehtimoliy javobi “Yadro qurolini tarqatmaslik to‘g‘risidagi shartnoma”dan voz kechish bo‘lishi mumkin. Bu shartnoma 190 dan ortiq davlatlar tomonidan imzolangan. Unda yadro quroliga ega bo‘lgan davlatlar tomonidan qurollarni boshqalarga bermaslik nazarda tutiladi. Shuningdek, yadro quroliga ega bo‘lmagan davlatlardan atom qurolini ishlab chiqarmaslik talab etiladi.
AQSH prezidenti Donald Tramp Eron bilan yadro dasturi bo‘yicha muzokaralar olib borishga ochiqligini bir necha bor ta’kidlagan. Ammo kelishuvga qancha vaqt ichida erishilishi hali ham noma’lum. Buyuk Britaniya, Fransiya yoki Germaniya kabi Yevropa davlatlari ham oktyabr oyi oxirigacha Eronga sanksiya joriy etishni rejalashtirgan.
Izoh (0)