AQSH Immigratsiya va bojxona politsiyasi (ICE) noqonuniy muhojirlarni deportatsiya qilish sur’atini oshirish maqsadida ularni saqlash uchun chodir shaharlar barpo etishni rejalashtirmoqda. Bu haqda The Wall Street Journal gazetasi o‘zi ko‘rish imkoniga ega bo‘lgan ichki hujjatlarga asoslanib ma’lum qilmoqda.
Ma’lum qilinishicha, AQSH prezidenti Donald Tramp ma’muriyati amaldorlari noqonuniy muhojirlarni joylashtirish uchun mavjud joylar sonining cheklanganligi ularni deportatsiya qilish sur’atini oshirishga to‘sqinlik qilayotganini aniqlagan. Ular 2025-yil oxirigacha muhojirlarni joylashtirish uchun 100 mingtagacha o‘rin tashkil etishni maqsad qilgan. Nashrning eslatishicha, iyul oyi boshida AQSH Kongressi immigratsiya politsiyasiga 2029-yilgacha bo‘lgan rejalarini amalga oshirish uchun 74 milliard dollar ajratgan edi.
“Rejalarda AQSH harbiy bazalari va ularga tutash ICE qamoqxonalarida saqlash imkoniyatlarini tezda kengaytirish uchun iloji boricha tezroq chodir yoki “mustahkamlangan yumshoq inshootlar” qurishga ustuvor ahamiyat berilgan”, deya ta’kidlaydi nashr.
Nomi oshkor etilmagan amaldorlarning aytishicha, ular bunday yondashuvni afzal ko‘rishadi, chunki bu butun mamlakat bo‘ylab “qamoqxona kameralari”ni qidirishdan ko‘ra, muhojirlarni saqlash uchun ko‘proq joy yaratishga yordam beradi.
The Wall Street Journal immigratsiya politsiyasining ichki hujjatlariga tayanib qo‘shimcha qilishicha, idora noqonuniy muhojirlar uchun 9 mingdan ortiq joy yaratishga imkon beradigan to‘qqizta yangi loyiha ustida ishlamoqda.
“Hujjatlarda ko‘rsatilgan ustuvorliklardan birinchisi - bu Texasdagi Fort Bliss harbiy garnizonida 5 ming o‘rinli chodir shahar qurishdir. O‘tgan hafta bu loyiha boshqa kompaniyaga topshirildi va immigratsiya politsiyasi uni avgustgacha foydalanishga topshirishni rejalashtirmoqda”, deb yozadi nashr hujjatlarga tayanib.
Gazeta ma’lumotlariga ko‘ra, politsiyaning boshqa ustuvor yo‘nalishlari orasida Kolorado shtatidagi Xadson axloq tuzatish muassasasida, Indiana shtatidagi Atterberi harbiy garnizonida va Nyu-Jersidagi MakGuayr-Diks-Leykxerst qo‘shma bazasida qo‘shimcha o‘rinlar yaratish ham bor.
AQSH prezidenti Donald Tramp yil boshida noqonuniy migratsiyaga qarshi kurashni boshlaganidan so‘ng, AQSHda noqonuniy istiqomat qilayotgan 1 millionga yaqin chet ellik mamlakatdan chiqib ketdi.
Izoh (0)