Jizzaxning Sharof Rashidov tumani hokimi Mahmud Xolbo‘tayev pora bilan tezkor tadbirda ushlanganidan so‘ng, uning nomidan qarorlar imzolangani aniqlandi.
Mahmud Xolbo‘tayev 8-iyul kuni 10 ming dollar pora olayotganda DXX xodimlari tomonidan ushlanib, ehtiyot chorasi sifatida qamoqqa olingandi. Hokim hibsga olingan bo‘lishiga qaramay, 8—9-iyul kunlari uning nomi bilan 1,2 milliard so‘mdan ortiq pul ajratishga oid 5 ta qaror imzolangani haqida xabarlar tarqaldi.
“E-qaror” elektron tizimida 8—9-iyul kunlari haqiqatan ham Mahmud Xolbo‘tayev nomidan imzolangan 5 ta mahalliy kengash qarori mavjud bo‘lib, ularning ikkitasi (1, 2) u qo‘lga olingan 8-iyul kuni, uchtasi (1, 2, 3) esa 9-iyul kuni uning nomidan imzolangan.
Jizzax viloyati prokuraturasining ma’lum qilishicha, ushbu holat yuzasidan Sharof Rashidov tuman prokuraturasi tomonidan tergovga qadar tekshiruv harakatlari olib borilmoqda. To‘plangan hujjatlar bo‘yicha qonuniy qaror qabul qilinishi viloyat prokuraturasi tomonidan nazoratga olingan.
Izoh (0)