AQSH prezidenti Donald Tramp ma’muriyati Martin Lyuter Kingning o‘ldirilishi bo‘yicha Federal qidiruv byurosi hujjatlarini oshkor qildi. Bu haqda Milliy razvedka direktori Tulsi Gabbard ma’lum qildi.
Qotillikdan qariyb 60 yil o‘tib, u bilan bog‘liq 230 mingdan ortiq hujjat e’lon qilindi. Ular shaxsiy hayot daxlsizligini saqlash maqsadida minimal darajada tahrirlangan. Hujjatlar orasida FQB tergov tafsilotlari va ichki yozishmalar ham mavjud.
Martin Lyuter King 1968-yil aprel oyida Tennessi shtatining Memfis shahrida, 39 yoshida o‘ldirilgan. Uning o‘limi butun AQSH bo‘ylab noroziliklar va ommaviy tartibsizliklar to‘lqinini keltirib chiqargan. Suiqasd uchun ayblangan Jeyms Erl Rey hibsga olinib, 99 yillik qamoq jazosiga hukm etilgan. Ammo u 1998-yilda qamoqda vafot etgan. Kingning farzandlari esa uning haqiqiy qotil bo‘lganiga shubha bilan qaraydi.
Kingning hayot bo‘lgan ikki farzandi — 67 yoshli Martin III va 62 yoshli Bernis King — otalarining o‘ldirilishi “o‘nlab yillar davomida jamoatchilik e’tiborini tortib kelayotgan voqea” ekanini aytgan. Biroq ular bu masalaning “shaxsiy va murakkab tarixiy jihatlariga” e’tibor qaratilishi kerakligini ta’kidlagan. Ular hujjatlarni to‘liq tarixiy kontekstda ko‘rib chiqish zarurligini bildirgan.
Kingning o‘limi ko‘plab fitna nazariyalarini keltirib chiqargan. Ba’zi taxminlarga ko‘ra, suiqasd nafaqat bir shaxs, balki uyushgan guruhlar tomonidan uyushtirilgan bo‘lishi mumkin.
Tramp 2025-yil yanvar oyida AQSHning 35-prezidenti Jon Kennedi, uning ukasi — sobiq bosh prokuror Robert Kennedi va inson huquqlari himoyachisi Martin Lyuter King suiqasdlari bilan bog‘liq barcha materiallarni to‘liq oshkor qilish bo‘yicha farmoyish bergan edi. U bu va’dani birinchi prezidentlik davrida ham, ikkinchi saylovoldi kampaniyasida ham aytgandi. Siyosatchi qotilliklar bilan bog‘liq ma’lumotlarni oshkor qilish “jamoatchilik manfaatiga javob berishi”ni qayd etgan.
AQSHdagi shov-shuvli siyosiy qotilliklar
♦ Jon Kennedi AQSH prezidenti etib saylanganidan ikki yil o‘tgach, 1963-yil 22-noyabrda Dallasga rasmiy tashrifi chog‘ida otib o‘ldirildi.
Qotillikda gumonlanib sobiq dengiz piyodasi Li Harvi Osvald qamoqqa olindi. U uch kundan so‘ng tungi klub egasi Jek Rubi tomonidan otib o‘ldirilgan. Rubi keyinchalik qamoqxonada vafot etgan
♦ Jonning ukasi Robert Kennedi AQSH bosh prokurori (1961-1964) va Nyu York shtati senatori (1965-1968) lavozimlarida ishlagan. U demokratlardan prezidentlikka nomzodini qo‘ygan va 1968-yil 5-iyunda Los Anjelesda saylovoldi kampaniyasi davomidagi mitingda otib o‘ldirilgan.
Jinoyat sodir etilgan joyda falastinlik Serxan Serxan qo‘lga olingan. 1969-yilda u o‘lim jazosiga hukm qilingan, keyinchalik hukm umrbod qamoq jazosiga o‘zgartirilgan.
♦ 1968-yil 4-aprelda Tennessi shtatining Memfis shahrida qora tanlilar huquqlari harakatining yetakchisi, ruhoniy Martin Lyuter King o‘ldirildi. Uning: “Men orzu qilamanki, to‘rt farzandim bir kun kelib teri rangiga emas, balki shaxsiy fazilatlariga qarab baholanadigan mamlakatda yashaydi”, degan mashhur iborasi ommalashgandi.
Izoh (0)