Madagaskar qirg‘oqlari yaqinida 1721-yilda tarixdagi eng mashhur qaroqchilik bosqinlaridan birida qo‘lga olingan yelkanli kema qoldiqlari aniqlandi. Bu haqda Live Science deb xabar bermoqda.
Maʼlum qilinishicha, Hindistondan qimmatbaho yuklar tashiyotgan Portugaliyaning “Nosa Senora du Kabo” kemasiga Olivye Levasser boshchiligidagi dengiz qaroqchilari hujum qilgan.
Hozirda cho‘kkan kema Nusi-Buraxa oroli yaqinidagi kichik bandargoh tubida yotibdi. XVIII asr boshlarida, “qaroqchilikning oltin asri” deb atalgan davrda, bu yerda qaroqchilar makoni joylashgan bo‘lgan.
Kemaning aniqlangani ko‘plab dalillarga asoslangan. Olimlar uning tuzilishini tahlil qildi, tarixiy yozuvlar bilan solishtirdi va halokat joyidan topilgan ashyolarni o‘rgandi.
Topilmalar orasida yog‘och va fil suyagidan yasalgan buyumlar, jumladan, Bibi Maryam tasviri, xoch va Injil matni bitilgan taxtacha bor. Olimlarning fikricha, bular Hindistonning g‘arbiy qirg‘og‘idagi Portugaliya mustamlakasi markazi bo‘lgan Goada tayyorlanib, Lissabonga jo‘natilgan. Shuningdek, arabcha yozuvli oltin tangalar va chinni parchalari ham topildi.
Tarixiy manbalarga ko‘ra, “Nosa Senora du Kabo” 1721-yil boshida Goani tark etgan. U oltin quymalar va marvarid to‘la sandiqlarni tashigan. Kema bortida Portugaliya vitse-qiroli va Goa arxiyepiskopi bo‘lgan.
Kema bo‘ronda shikastlangan. Ekipaj suvda qolish uchun zambaraklarni bortdan tashlab yuborishga majbur bo‘lgan. Shu bois 8-aprelda kemani egallab olgan qaroqchilarga jiddiy qarshilik ko‘rsata olmagan.
Olimlarning hisob-kitoblariga ko‘ra, yukning qiymati bugungi kunda 138 million dollardan ortiq bo‘lishi mumkin. Bundan tashqari, qaroqchilar asirga olingan vitse-qirol uchun to‘lov olishgan. Arxiyepiskopning taqdiri noma’lumligicha qolmoqda.
Izoh (0)