Atlantika okeanida Kanar orollari sohili yaqinida ichida muhojirlar bo‘lgan qayiq halokatga uchrashi oqibatida kamida 1 nafar odam cho‘kib ketdi va 26 kishi bedarak yo‘qoldi. Bu haqda Reuters xabar berdi.
Ispaniya sohil qo‘riqlash xizmati Gran-Kanariya oroli janubidan 217 kilometr uzoqlikda halokatga uchragan kemadan 34 nafar odamni qutqargan. Shuningdek, ichida 63 nafar yo‘lovchi, jumladan, 2 nafar bola bo‘lgan yana ikkita kema janubdan 64 kilometr uzoqlikda suzayotgani aniqlangan. Sohil qo‘riqlash xizmati bortdagi hamma qutqarib olinganini ma’lum qilgan.
Ispaniya sohil qo‘riqlash xizmatining samolyoti halokatga uchragan kemadagilarni qutqarishga yetib kelguniga qadar, yon-atrofdagi ikkita savdo kemasi va vertolyot migrantlarga yordam qilgan. Qutqarib qolingan muhojirlar Gran-Kanariyadagi Arginegin portiga kunduzgi soat 10 da yetib kelgan. Ma’lumotlarga ko‘ra, kema yo‘lovchilarining hammasi Sahroyi kabir janubidagi mamlakatlarning fuqarolari.
Marokashdan 96 kilometr g‘arbda joylashgan Kanar orollari oxirgi yillarda muhojirlarning Yevropaga kelishi uchun eng ommalashgan dengiz yo‘liga aylanib qoldi. Monitoring guruhi o‘tgan yilning o‘zida 4400 ga yaqin odamning Ispaniyaga kelishga urinib, suvga cho‘kib halok bo‘lganini aniqlagan. 2021-yilda jami 22 316 nafar muhojir kemalarda Ispaniyaga yetib kelgan.
Avval Gretsiya yaqinida migrantlar bo‘lgan qayiq ag‘darilib ketgani, Madagaskar yaqinida 100 dan ortiq yo‘lovchisi bor kema cho‘kib ketib, kamida 17 kishi halok bo‘lgani, O‘rta Yer dengizida 130 ga yaqin noqonuniy muhojir bedarak yo‘qolgani haqida xabarlar berilgan.
Izoh (0)