Madagaskar hukumati va sanoat rasmiylariga ko‘ra, AQSH prezidenti Donald Tramp tomonidan joriy etilgan 47 foizlik boj tariflari sabab mamlakatda 60 mingga yaqin ish o‘rni yopilishi mumkin. Bu haqda Groupement des Entreprises Franches et Partenaires (GEFP) sanoat uyushmasi vakillariga tayanib, Reuters yozmoqda.
GEFP tomonidan e’lon qilingan bayonotga ko‘ra, Oq uy AQSHdan kam miqdorda mahsulot import qiladigan qashshoq davlatlarga nisbatan boj tariflarining eng yuqori darajasini qo‘llagan. Madagaskar ulardan biri bo‘lib, mamlakatda 180 ming kishi to‘qimachilik faoliyati bilan shug‘ullanadi. Mazkur sektor Madagaskar yalpi ichki mahsulotining taxminan 20 foizini tashkil qiladi.
GEFP ijrochi direktori Rindra Andriamahefaning so‘zlariga ko‘ra, 47 foizlik boj stavkasi doimiy va vaqtinchalik ishdan bo‘shatishlarga olib kelishi mumkin, bu esa mamlakat iqtisodiyotiga jiddiy zarba bo‘ladi.
“AQSHning mazkur qarori taxminan 60 ming ish o‘rniga ta’sir qiladi,” dedi u.
Tashkilot prezidenti Beatrisa Chan Ching Yiu esa investorlar AQSh tomonidan atigi 10 foizlik boj joriy etilgan boshqa mamlakatlarga yuz burishini ta’kidladi.
“Pandemiya bir muammo edi. Ammo hozir biz butunlay boshqacha tahdidga duch kelyapmiz. Afsuski, vaqtinchalik yoki doimiy ishdan bo‘shatishlar muqarrar bo‘lishi mumkin” degan GEFP rahbari.
Madagaskar hukumati esa AQSH rasmiylari bilan boj tariflari bo‘yicha muzokaralar boshlangani, shuningdek qit’aning boshqa davlatlari bilan hamkorlikda umumiy pozitsiya ishlab chiqilishini ma’lum qildi.
Ma’lumot uchun, Madagaskar 2024-yili Qo‘shma Shtatlarga 733 million dollarlik mahsulot eksport qilgan, ularning katta qismi AGOA qonuni doirasida bojxona imtiyozlari bilan yetkazib berilgandi.
Izoh (0)