Madagaskar politsiyasi vaziri Serj Jelle o‘zi o‘tirgan vertolyotning okeanga qulashidan omon qoldi va qariyb 10 soat davomida sohilga qarab suzdi, uni baliqchilar qutqardi. Bu haqda Agence France-Presse’ga tayanib, Meduza xabar berdi.
57 yoshli Jelle va yana uch kishini olib ketayotgan vertolyot 20-dekabr kuni taxminan soat 19:00 da halokatga uchragan. Vazir hodisadan bir necha soat avval Madagaskarning shimoli-sharqiy sohili yaqinida 120 dan ortiq yo‘lovchisi bor kema cho‘kib ketgan joyga qarab uchayotgandi. Kema haddan tashqari ko‘p yukka dosh berolmagan. So‘nggi ma’lumotlarga ko‘ra, 64 kishi halok bo‘lgan, yana 20 kishi bedarak yo‘qolgan, 45 kishi qutqarilgan.
Jellening aytishicha, kuchli shamol tufayli vertolyot suv to‘lqiniga urilgan. Vazirda qutqaruv nimchasi bo‘lmagan, u suv yuzasida qolish uchun uchuvchining o‘rindig‘idan foydalangan. Ertalab soat to‘rtlarda dengizga chiqqan baliqchilar uni ko‘rib qolgan.
“Hali ajalim yetgani yo‘q”, — dedi Jelle qutqaruvdan keyingi birinchi intervyusida. U 24 soat ichida ishga qaytmoqchiligini ta’kidladi. Jelledan tashqari vertolyot mexanigi ham suzib kelishga muvaffaq bo‘lgan. Vertolyot bortidagi uchuvchi va yana bir politsiyachi rasman bedarak yo‘qolgan, deb hisoblanmoqda.
Serj Jelle avgust oyida Madagaskar prezidenti davlat to‘ntarishiga urinish muvaffaqiyatsizlikka uchragani haqidagi mish-mishlar tufayli avvalgi Vazirlar Mahkamasini to‘liq tarkibda ishdan bo‘shatganidan so‘ng vazir bo‘lgandi. Ungacha Jelle o‘ttiz yil davomida politsiyada xizmat qilgan.
Izoh (0)