Madridning “Real” klubi 2024/25-yilgi mavsum yakunlari bo‘yicha moliyaviy hisobotini e’lon qildi. Unda qayd etilishicha, klubning sof foyda ko‘rsatkichi 56 foizga oshgan. “Qaymoqranglilar” ushbu yilni 24 million yevro sof foyda bilan yakunladi. Bu natija o‘tgan yilgiga nisbatan 9 million yevroga ko‘proqdir.
Transferlar hisobga olinmaganda, umumiy daromad miqdori 1,185 milliard yevroni tashkil etdi. Bu ko‘rsatkich futbol tarixidagi rekord natija hisoblanadi — ilgari hech qaysi klub bir mavsum ichida bu darajada daromad qilmagan.
“Real Madrid”ning EBITDA (foizlar, soliqlar va amortizatsiyadan tashqari foyda) ko‘rsatkichi 242,9 million yevroga yetib, klub tarixidagi eng yaxshi natija qayd etilgan.
Shuningdek, hisobotda “Real”ning o‘z kapitali 598 million yevroga yetgani va qarz koeffitsienti 0 ekani ta’kidlangan. Bu klubning moliyaviy mustaqilligi va har qanday to‘lovga layoqatliligidan dalolat beradi.
Shu bilan birga, stadion rekonstruksiyasi uchun olingan kreditlardan tashqari sof qarz miqdori atigi 12 million yevroni tashkil qilmoqda. Stadion yangilanishiga ajratilgan kreditlarning hali to‘lanmagan qismi esa 1,132 milliard yevroga teng.
Izoh (0)