Besh karra “Oltin to‘p” sohibi Krishtianu Ronalduning to‘ng‘ich farzandi — Portugaliya terma jamoasi safida ilk sovrinini qo‘lga kiritdi. Bu haqda TCR nashriga tayanib Championat xabar berdi.
Yaqinda 14 yoshga to‘lgan kichik Krishtianu ilk bor Portugaliya U-15 terma jamoasidan chaqiruv oldi. Yevropaning turli yosh toifalaridagi terma jamoalari ishtirok etgan xalqaro turnir finalida portugaliyaliklar Xorvatiya U-15 jamoasiga qarshi maydonga tushdi. Uchrashuv 3:2 hisobida Portugaliya foydasiga yakunlandi.
Eng e’tiborlisi shundaki, Krishtianu Junior bu bahsda dubl qayd etdi. U 13 va 44-daqiqalarda xorvatlar darvozasini ishg‘ol qilishga muvaffaq bo‘ldi. Bu natija bilan u xalqaro maydondagi o‘zining ilk sovrinini qo‘lga kiritdi.
Ushbu muvaffaqiyat fonida, unga otasi to‘p surgan “Real Madrid” klubi qiziqish bildirmoqda. Ma’lumotlarga ko‘ra, Madrid klubi skautlari uning Portugaliya safidagi debyut uchrashuvini bevosita stadiondan kuzatishgan. Defensa Central nashrining ta‘kidlashicha, “qirollik klubi” prezidenti Florentino Peres skautlik xizmatiga yosh futbolchining muvaffaqiyatini diqqat bilan kuzatishni buyurgan.
Shuningdek, kichik Ronalduning Xorvatiyadagi turnirdagi harakatlari “Bavariya”, “Borussiya Dortmund”, “Yuventus”, “Inter”, “Manchester Yunayted”, “Zalsburg”, “Hoffenxaym” kabi klublarning skautlari e’tiboridan ham chetda qolmagan.
Izoh (0)