Mossad Isroil razvedkasi rahbari David Barnea shu hafta Vashingtonga tashrif buyurib, AQSHdan G‘azodagi yuz minglab falastinliklarni qabul qilishga tayyor davlatlar bilan muzokaralarda ko‘maklashishni iltimos qildi. Bu haqda Axios tashrif tafsilotlaridan xabardor manbalarga asoslanib xabar bermoqda.
Barnea Oq uyning maxsus vakili Stiv Uitkoffga Isroil allaqachon Efiopiya, Indoneziya va Liviya bilan muloqot olib borayotganini ma’lum qilgan. Uning aytishicha, bu mamlakatlar ko‘chib keluvchilarni qabul qilishga nisbatan ma’lum “ochiqlik” bildirgan. Shuningdek, u AQSHdan ushbu davlatlarni rozilikka undash uchun diplomatik va iqtisodiy rag‘batlardan foydalanishni so‘ragan.
Manbalarning xabar berishicha, Uitkoff aniq javob bermagan, Tramp ma’muriyati esa hozircha rasmiy nuqtai nazarini bildirmagan. Oq uy, Netanyaxu idorasi va yuqorida tilga olingan mamlakatlar Tashqi ishlar vazirliklari izoh berishdan bosh tortgan.
Fevral oyida Donald Tramp G‘azoning ikki million aholisini to‘liq “evakuatsiya qilish”ni taklif etgan edi, biroq bu tashabbus arab davlatlari va jahon jamoatchiligi tomonidan keskin tanqidga uchradi va shundan so‘ng to‘xtatib qo‘yildi. Shunday bo‘lsa-da, Isroil amaldorlarining ta’kidlashicha, AQSH agar Isroil bu rejani amalga oshirmoqchi bo‘lsa, ko‘chirish uchun mamlakatlarni o‘zi topishi kerakligini tushuntirgan.
Ma’lumotlarga ko‘ra, Isroil G‘azoning barcha aholisini Misr bilan chegaradagi “gumanitar hudud”ga joylashtirish rejasini ishlab chiqishda davom etmoqda. Bu esa Qohira va G‘arb poytaxtlarini tashvishga solmoqda. Netanyaxu hukumati ko‘chirishni “ixtiyoriy” deb atayotgan bo‘lsa-da, huquq himoyachilari va huquqshunoslar, jumladan, AQSH va Isroildagilar ham — hozirgi vaziyatda bu harbiy jinoyat sifatida baholanishi mumkinligi haqida ogohlantirmoqda.
Netanyaxu o‘tgan hafta Oq uyda so‘zlagan nutqida, Isroil falastinliklarni qabul qilishga tayyor bo‘lgan davlatlarni izlash masalasida “AQSH bilan yaqindan hamkorlik qilayotgani”ni aytdi. Shuningdek, u bir qator davlatlar bilan “muzokaralarning yakuniy bosqichiga yaqinlashayotganini” qo‘shimcha qilgan va Trampning g‘oyasini “ajoyib” deb atagan. Uning fikricha, odamlar “tanlov imkoniyatiga ega bo‘lishi kerak”.
Bundan avval Isroil mudofaa vaziri Isroil Kats G‘azo sektorining janubiy qismidagi Rafah xarobalari o‘rnida 60 kun ichida 600 ming falastinlikni joylashtirish uchun “insonparvarlik shahri” barpo etishni buyurgani xabar qilingandi.
18-may kuni Isroil armiyasi “Gideon aravalari” nomli keng ko‘lamli quruqlik operatsiyasi doirasida anklavning shimoliy va janubiy hududlarida jangovar harakatlar boshlanganini e’lon qildi. Unda beshta diviziya ishtirok etmoqda.
May oyi boshida Isroil G‘azo sektori aholisini mintaqa tashqarisiga chiqarish maqsadida “Gideon aravalari” maxsus operatsiya o‘tkazishi ma`lum qilingandi. Operatsiya doirasida anklav janubida yagona gumanitar hudud tashkil etilishi rejalashtirilgan bo‘lib, u yerda 2 millionga yaqin tinch aholi joylashtirilishi ko‘zda tutilgan.
Izoh (0)