Dunyoning turli burchaklaridan minglab faollar 12-iyun kuni Misrga yetib kelgan. Ular Isroilning G‘azo blokadasini buzishni maqsad qilgan. Bu haqda CNN xabar berdi.
Bu harakat “G‘azoga global yurish” deb nomlangan. Unga 80 dan ortiq mamlakatdan 4 mingga yaqin ko‘ngillilar qo‘shilganini tashkilotchilar ma’lum qilgan. Ular dastlab Qohiraga qo‘nadi, so‘ng avtobuslarda Sinay shimolidagi Arish shahriga boradi. Keyin cho‘l yarimoroli orqali taxminan 30 mil masofani bosib o‘tib, Rafahdagi G‘azo chegarasining Misr tomoniga yetib borishi aytilgan.
Faollar marshrut bo‘ylab chodirlarda uxlaydi va manzilga 13-iyun yetib kelishi kutilmoqda. Ammo urushdan vayron bo‘lgan anklavga kirish rejalashtirilmagan.
Bu harakat Misrni noqulay ahvolga solib qo‘yadi, chunki u Isroil va AQSH bilan aloqalarini muvozanatda ushlashga harakat qilmoqda. U Isroilning xatti-harakatlaridan g‘azab kuchayib borayotgan bo‘lsa ham, Rafah o‘tish joyining o‘z tomonini falastinliklar uchun yopiq saqlab turgan edi.
Isroil mudofaa vaziri Israel Kats 11-iyun kuni bergan bayonotida Misr hukumatidan “jihodchi namoyishchilarning Misr-Isroil chegarasiga kelishiga yo‘l qo‘ymaslik va ularga provokatsiyalar uyushtirish hamda G‘azoga kirishga urinishlariga yo‘l qo‘ymaslik“ni kutayotganini aytgandi.
Xalqaro faollar safiga Tunisdan kelgan yana 2 ming kishilik namoyishchilar karvoni ham qo‘shiladi. Uning 11-iyun kuni Misrga qo‘shni bo‘lgan Liviyaga yetib kelgani aytilgan.
Marshga qo‘shilayotganlar orasida Janubiy Afrikaning sobiq qonun chiqaruvchisi, Nelson Mandelaning nabirasi Nkosi Zvelivelile Mandela va AQSH Davlat departamentining sobiq diplomati, Bayden ma’muriyati davrida Vashingtonning G‘azodagi urushni hal qilgani uchun AQSH hukumatidagi lavozimidan iste’foga chiqqan Xala Rxarrit bor.
Izoh (0)