Isroil tashqi ishlar vaziri Gideon Saar 14-iyul kuni mamlakatning G‘azo sektorini uzoq muddat nazorat qilish niyati yo‘qligini ma’lum qildi. Bu haqda Fox News xabar berdi.
Gideo Saar xavfsizlikdan xavotirda ekanini ta’kidlagan.
“G‘azo sektorini uzoq muddat nazorat ostida ushlash niyatimiz yo‘q. Biz faqat xavfsizlikdan xavotirdamiz”, degan u.
Vazirning bu gaplari bosh vazir Binyamin Netanyaxuning fikrlariga zid kelmoqda. Netanyaxu may oyida Isroil butun G‘azoni nazoratga olishini aytgandi.
“Biz AQSH prezidenti Donald Trampning rejasini amalga oshiramiz. Bu yaxshi reja va shubhasiz o‘z natijasini ko‘rsatadi. G‘azoni tark etishni istagan odamlar ketishi, qolishni xohlaganlar qolishi mumkin”, degan bosh vazir.
Ammo Sa’arning qo‘shimcha qilishicha, hozirda anklavni nazorat qilayotgan Falastinning HAMAS guruhi “G‘azo kelajagining bir qismi bo‘la olmaydi”. Tashqi ishlar vaziri shuningdek, G‘azodagi harbiy operatsiyalar nomutanosib deb tanqid qilganlarga murojaat qilib, shunday degan:
“Siz G‘arbning ISHIDni yo‘q qilgan hujumi haqida nima degan bo‘lardingiz? Bu harakat mutanosibmidi?”
AQSH homiyligida taklif etilayotgan G‘azoda o‘t ochishni to‘xtatish kelishuvi hali hamon amalga oshgani yo‘q. Rejaga ko‘ra, HAMAS garovga olinganlarni ozod qilishi lozim. Isroil HAMAS o‘z qurollarini topshirib, G‘azoni boshqarishdan voz kechsa, barcha harbiy harakatlarni to‘xtatishga tayyorligini bildirgan.
Izoh (0)