Isroil kuchlari qamalda qolgan G‘azoni bombardimon qilishda davom etmoqda. 14-iyul kuni sektorga qilingan hujumlar oqibatida 78 falastinlik halok bo‘ldi. Bu haqda Al Jazeera xabar berdi.
Wafa agentligiga ko‘ra, Isroilning Rafahdagi yordam tarqatish punktiga uyushtirgan hujumi oqibatida kamida 5 kishi halok bo‘lgan. Shu bilan, Isroil va AQSH tomonidan qo‘llab-quvvatlanadigan G‘azo gumanitar jamg‘armasi yordam markazlarida halok bo‘lgan falastinliklarning soni 838 nafarga yetgan.
G‘azo janubidagi Xon Yunusda ko‘chmanchilar lageriga berilgan zarba oqibatida 9 kishi halok bo‘lib, ko‘plab odamlar yaralangan. Bureyj qochqinlar lageri yaqinidagi savdo markaziga hujum uyushtirilishi sabab 4 nafar odam qurbon bo‘lgan. G‘azo shahrida esa kamida 24 nafar falastinlik o‘ldirilib, yana o‘nlab kishilar jarohatlangani ma’lum qilingan.
Isroil matbuoti G‘azo shahrida yahudiylarga pistirma uyushtirilgani, tank raketa zarbasiga uchragani, keyinroq esa o‘qotar qurollar bilan o‘qqa tutilgani haqida xabar bergan. Keyinchalik Isroil harbiylari hodisa oqibatida 3 nafar askar halok bo‘lganini tasdiqlagan. Al Jazeera’ning xabar berishicha, Isroil qo‘shinlari bunga javoban Tuffa va Shujayea mahallalari yaqinida turar joy binolarini yakson qilib, ommaviy havo hujumlari uyushtirgan.
Izoh (0)