Isroil hukumati va armiyasi o‘rtasida G‘azo janubida falastinliklar uchun quriladigan lagerning narxi va ta’siri tufayli ziddiyat yuzaga keldi. Siyosatchilar sobiq bosh vazir Ehud Olmertni tanqid qildi, sababi u loyihaning amalga oshirish falastinliklar uchun “konsentratsion lager”ga aylanishini aytgandi. Bu haqda The Guardian xabar berdi.
“Gumanitar shahar” deb nomlangan bu loyiha G‘azodagi otashkesim muzokaralarida bahsli masalaga aylangan. Isroil G‘azoning muhim hududlarida, jumladan Rafah xarobalarida o‘z askarlarini qoldirishni istamoqda. Mudofaa vaziri Isroil Katsning aytishicha, aynan o‘sha yerda 600 kishilik lager quriladi. Ehud Olmert esa mazkur lagerga falastinliklarni majburan ko‘chirish “etnik tozalash” hisoblanishini aytgan.
Isroil allaqachon G‘azo va G‘arbiy Sohilda harbiy jinoyatlar sodir etmoqda, lager qurilishi esa vaziyatni yanada keskinlashtiradi. Bu konslager bo‘ladi. Afsuski, shunday. Agar falastinliklar yangi “gumanitar shahar”ga majburan ko‘chirilsa, buni etnik tozalashning bir qismi deyish mumkin. Bu hali sodir bo‘lgani yo‘q, degan Isroil sobiq bosh vaziri Olmert.
HAMASning yuqori martabali a’zosi Husom Badronning aytishicha, lager qurish rejasi muzokaralarni murakkablashtirish uchun “qasddan qilingan to‘sqin” hisoblanadi.
Bu ajratilgan, izolyatsiyalangan shaharchaga aylanadi, gettoga o‘xshaydi. Buni mutlaqo qabul qilib bo‘lmaydi va hech bir falastinlik bunga rozi bo‘lmaydi, degan u.
Katsning aytishicha, avvaliga 600 ming kishi, keyinchalik esa G‘azoning butun aholisi lagerga ko‘chiriladi. Reja bosh vazir Binyamin Netanyaxu tomonidan qo‘llab-quvvatlangan. 2006–2009-yillarda bosh vazir bo‘lgan Ehud Olmert loyihani ochiqchasiga tanqid qilgan siyosatchilardan biri bo‘ldi.
Isroil meros vaziri Amichai Eliyahu tanqidlar sababli Olmertni qamoqqa olishga chaqirdi. U bu fikrni aytayotib, Olmert ilgari korrupsiya uchun qamoqda bo‘lganini ham eslatib o‘tdi.
Olmert qamoqxonani juda yaxshi biladi. Uni butun dunyo bo‘ylab tarqatayotgan nafrat va antisemitizmdan to‘xtatishning boshqa yo‘li yo‘q, degan Eliyahu.
Isroil harbiylari ham lager qurilishi tarafdori emas. Ular reja bo‘yicha hujjat tayyorlash buyrug‘ini olgan. Isroil armiyasi bosh shtabi rahbari Eyel Zamir va bosh vazir Netanyaxu o‘rtasida lager yuzasidan keskin tortishuv bo‘lgan.
Zamirning aytishicha, loyiha harbiy kuchlardan mablag‘ va boshqa resurslarni olib qo‘yib, ularning jang qilish qobiliyatini pasaytiradi hamda garovga olinganlarni qutqarishga xalaqit beradi. Uning idorasi ilgari tinch aholini ko‘chirish va “to‘plash” urushning maqsadi emasligini ta’kidlagandi.
Netanyaxu esa Zamirga keskin javob qaytargan va u tomonidan taqdim etilgan reja qurilish ishlarining bir yilgacha cho‘zilishi va qimmatga tushishiga olib kelishini aytgan
Men haqiqiy, bajariladigan reja so‘ragandim, degan bosh vazir va lagerni qurish uchun arzonroq va tezroq variantni 15-iyulgacha tayyorlashni talab qilgan.
Isroil Moliya vazirligi ham “gumanitar shahar” loyihasiga e’tirozlar bildirgan. Loyihaning yillik xarajati 15 milliard shekel (taxminan 4,05 milliard dollar) turadi va bu davlat byudjetiga og‘ir yuk bo‘ladi. Natijada bu xarajat isroillik soliq to‘lovchilar zimmasiga tushadi. Bu maktablar, shifoxonalar va ijtimoiy yordam dasturlariga pul ajratishning kamayishiga olib kelishi mumkin.
Izoh (0)