Avstraliya hukumati Ukrainaga Rossiyadan o‘zini himoya qilish uchun 245 million Avstraliya dollari (160 million dollar) miqdoridagi yordam paketi doirasida M1A1 Abrams tanklarini berganini ma’lum qildi. Bu haqda Reuters agentligi xabar bermoqda.
Ukrainaning NATOga aʼzo bo‘lmagan eng yirik hamkorlaridan biri – Avstraliya Rossiya armiyasi 2022-yilning fevral oyida Ukrainaga bostirib kirganidan beri Kiyevga o‘q-dorilar va mudofaa uskunalarini yetkazib bermoqda.
Avstraliya mudofaa vaziri Richard Marlesning aytishicha, Ukraina Avstraliya tomonidan taqdim etilgan 49 ta tankning katta qismini allaqachon olgan, qolganlari esa yaqin oylarda yetkazib beriladi.
"M1A1 Abrams tanklari Ukrainaga Rossiyaning noqonuniy va axloqsiz bosqiniga qarshi kurashiga katta hissa qo'shadi", degan Richard Marles.
Tanklar Avstraliyaning Kiyevga bergan 1,5 milliard dollarlik yordamining bir qismi hisoblanadi. O'tgan yilning kuzida The Sydney Morning Herald nashri Ukraina tez orada Avstraliyadan Amerika Abramslarini qabul qilishi mumkinligini yozgan edi.
Shu yilning may oyida Avstraliya bosh vaziri Entoni Albaneze va mudofaa vazirligi rahbari Kiyevga va'da qilingan 49 ta Abrams yetkazib berish boshlanganini e'lon qilgan edi.
Izoh (0)