AQSH prezidenti Donald Tramp agar fermerlar kafolat bersa, ularning qo‘lida ishlovchi mehnat muhojirlariga AQSHda qolishga ruxsat berishini aytdi. Bu haqda Reuters xabar berdi.
Tramp mavsumiy ishchi kuchiga muhtoj fermerlarga yordam berish kerakligini ta’kidladi. U bu borada Ichki xavfsizlik vazirligi bilan hamkorlik qilayotganini aytdi.
Agar fermer bu odamlar uchun qandaydir tarzda kafolat berishga tayyor bo‘lsa, Kristi (Ichki xavfsizlik vaziri), menimcha, buni ma’qullashimiz kerak bo‘ladi, shunday emasmi? Bilasizmi, biz bu masalada to‘g‘ri yo‘l tutamiz. Chunki barcha ishchilarni ferma xo‘jaliklaridan olib ketishni istamaymiz. Biz fermer xo‘jaliklari hozirgidek yaxshi faoliyat yuritishini xohlaymiz.
Hozir biz qonun loyihasi ustida ishlamoqdamiz, chunki fermerlar vaziyatni yaxshiroq biladi, ular bu odamlar bilan yillar davomida ishlashgan. Yillar davomida shunday holatlar bo‘lganki, odamlar fermada 14-15 yil ishlab, so‘ng shafqatsizlarcha haydab yuborilgan va biz bunga yo‘l qo‘ymasligimiz kerak, degan AQSH prezidenti.
U ichki xavfsizlik vaziri bilan qishloq xo‘jaligi va mehmonxona sohasidagi ishchi kuchi tanqisligini bartaraf etish bo‘yicha qonun loyihasi ustida ishlayotganini ta’kidladi. Tramp migratsiyaga nisbatan qat’iy siyosat yuritmoqda. Kristi Noem noqonuniy ravishda AQSHga kirganlarni deportatsiya qilish bo‘yicha ishlarni boshqarmoqda. Qat’iy migratsiya siyosati ortidan ayrim fermerlar ishchi kuchi kamaygani sabab hosillari xavf ostida qolayotganidan shikoyat qilgan.
Biz fermerlar, mehmonxona va dam olish maskanlari egalari bilan hamkorlik qilishimiz kerak. Ular bilan birga ishlashimiz, kuchli va oqilona harakat qilishimiz lozim. Sizni boshqaruvchi etib tayinlaymiz va mas’uliyatni zimmangizga yuklaymiz.
Izoh (0)