AQSH Oliy sudi prezident Donald Tramp ma’muriyatiga muhojirlarni o‘z vatanidan boshqa mamlakatlarga deportatsiya qilishni davom ettirishga ruxsat berdi. Bu haqda BBC xabar berdi.
Sudya qaroriga ko‘ra, muhojirlar uchinchi davlatga deportatsiya qilinishidan avval bu haqda o‘z mamlakati rasmiylariga xabar bera olmaydi. Sudning 3 nafar liberal sudyasi qarordan norozi bo‘lib, bu “qoidabuzarlikni mukofotlash” ekanini aytgan.
Qaror Myanma, Janubiy Sudan, Kuba, Meksika, Laos va Vyetnamdan kelgan 8 nafar muhojirga taalluqli. Ular may oyida Janubiy Sudanga deportatsiya qilinayotgan edi. Tramp ma’muriyati mazkur muhojirlarni “yomonlarning yomoni” deb atagan.
AQSH okrug sudyasi Brayan Merfi migrantlar deportatsiya qilinishini noqonuniy deb topgan. Unga ko‘ra, muhojirlar uchinchi davlatlarga deportatsiya qilinsa, ular qiynoqqa solinishi yoki o‘ldirilishi ehtimoli mavjud.
Sudyalar Sonia Sotomayor, Elena Kagan va Ketanji Braun Jekson qarorni tanqid qilib, uni “qo‘pol suiiste’mollik” deb atagan. Ichki xavfsizlik departamenti esa bu “Amerika xalqining xavfsizligi uchun g‘alaba” ekanini bildirgan.
Tramp ma’muriyatining ta’kidlashicha, 8 nafar muhojir AQSHda “yovuz jinoyatlar”, jumladan qotillik, o‘t qo‘yish va qurolli bosqinchilik sodir etgan. Ammo muhojirlarning advokatlari Oliy sudga bergan arizasida hibsga olinganlarning ko‘pchiligi jinoyat sodir etmaganini aytgan.
Yangi qaror respublikachilar uchun ommaviy deportatsiyalar yo‘lidagi yana bir g‘alaba hisoblanadi. Oliy sud may oyida Venesueladan kelganlar uchun “vaqtinchalik himoya maqomi”ni tugatishga ruxsat bergandi. Shundan so‘ng Tramp Kuba, Gaiti, Nikaragua va Venesueladan kelgan yarim millionga yaqin muhojirga AQSHda 2 yil qolish imkonini beruvchi gumanitar dasturni vaqtincha to‘xtatishini aytgandi.
Izoh (0)