O‘zbekistonlik ayollar Slovakiyaga qandolatchilik yo‘nalishida ishga taklif qilinmoqda. Bu haqda Migratsiya agentligi xabar berdi.
Unga ko‘ra, Migratsiya agentligi hamkorligida Slovakiyaning “Getbid, s.r.o.” korxonasi tomonidan ayollar uchun bo‘sh ish o‘rinlari e’lon qilinmoqda. Bo‘sh ish o‘rni — qandolatchi (konditer) yordamchisi. Oylik ish haqi 816 yevrodan 1016 yevrogacha (qo‘shimcha mukofot pullari bilan). Ish o‘rinlari soni 30 ta. Ish vaqti esa 4 smenali haftalik jadval asosida, 8 soatdan 12 soatgacha.
Nomzodlarga qo‘yiladigan talablar:
- 40 yoshgacha bo‘lgan ayollar;
- oliy ma’lumotga ega bo‘lish;
- rus yoki ingliz tilini muloqot darajasida bilish;
- sanitariya qoidalari va ishlab chiqarish tartibiga qat’iy rioya qilish;
- kamida 1 yillik ish tajribasiga ega bo‘lish;
- tanlov suhbat asosida amalga oshiriladi.
Ish beruvchi quyidagi xarajatlarni o‘z hisobidan qoplaydi (oylik ish haqidan ushlab qolinmaydi):
- ishga borib-kelish transporti;
- yashash joyi;
- ish vaqtida ovqatlanish;
- tibbiy sug‘urta.
Nomzod zimmasida:
- aviachipta xarajati;
- viza rasmiylashtirish xarajatlari (ish boshlagandan so‘ng Migratsiya agentligi tomonidan qoplab beriladi).
Shuningdek, agentlik hamkorligida Slovakiyaning “HUDOS s.r.o.” kompaniyasi tomonidan yuk mashinasi haydovchilari uchun bo‘sh ish o‘rinlari e’lon qilinmoqda. Ish turi: CE toifali yuk mashinasi haydovchisi. Oylik maosh to‘liq ishga qabul qilingandan so‘ng kuniga 75 yevro. Bo‘sh ish o‘rinlari soni esa 30 ta.
Ma’lumot uchun, Slovakiyaning doimiy aholisi soni 5,5 million kishidan iborat. 2024-yilda mamlakat yalpi ichki mahsuloti 132,9 milliard dollarni tashkil etgan. Bu miqdor aholi jon boshiga qariyb 24 163 dollardan to‘g‘ri keladi.
Taqqoslash uchun, ayni paytda O‘zbekiston aholisi 37,5 million nafardan ortgan. 2024-yilda respublika yalpi ichki mahsuloti hajmi 115 milliard dollarni tashkil etgan. Bu aholi jon boshiga 3063 dollar degani.
2024-yilda O‘zbekistonga xorijiy davlatlardagi mehnat muhojirlari 14,8 milliard dollar pul yuborgan. Bu 2023-yildagidan 3,4 milliard dollarga ko‘p. Mablag‘larning 77 foizi Rossiyadan (11,5 milliard dollar) kelib tushgan. Shu bilan birga, Qozog‘istondan 795 million dollar, AQSHdan 577 million dollar, Janubiy Koreyadan 534 million dollar, Turkiyadan 405 million dollar, Buyuk Britaniyadan 135 million dollar o‘tkazilgan.
Izoh (0)