Buxoro viloyati G‘ijduvon tumanidagi bog‘chada tarbiyachi bolalarni ayovsiz kaltakladi. Viloyat maktabgacha va maktab ta’limi boshqarmasi holat yuzasidan ma’lumot berdi.
Ma’lum qilinishicha, ushbu holat Buxoro viloyati maktabgacha va maktab ta’limi boshqarmasi tomonidan tezkor o‘rganib chiqildi. O‘rganish jarayonida videotasvirda aks etgan holat joriy yilning 27-may kuni yuz bergani aniqlandi.
O‘z lavozim majburiyatlarini qo‘pol ravishda buzgan tarbiyachi bilan tuzilgan mehnat shartnomasi tashkilot direktorining 2025-yil 30-iyundagi buyrug‘i asosida bekor qilindi.
Ayni paytda maktabgacha ta’lim tashkilotida bunday holatni yuzaga keltirgan sabablar batafsil o‘rganilib, bu borada mavjud kamchiliklarni bartaraf etish choralari ko‘rilmoqda.
Bog‘chalardagi voqealar
2025-yil 3-aprel kuni Samarqand viloyati Payariq tumanidagi bog‘chada bolalarga qo‘pol munosabatda bo‘lgan tarbiyachi ishdan olingani ma’lum qilindi. 27-mart kuni Toshkent viloyatidagi bog‘chada ham bolalarga qo‘pollik qilib kelgan tarbiyachi ishdan olingandi. 14-fevral kuni Samarqandning Jomboy tumanidagi bog‘chada tarbiyachi bolalarni urib, ularni haqoratlagani uchun jarimaga tortilib, ishdan ketgandi.
28-fevral kuni Toshkent viloyatining Parkent tumanidagi bog‘chada tarbiyachi bolalarning qulog‘idan tortib, yuz va bosh qismlariga bir necha marotaba urgani aniqlandi. 21-fevralda Toshkentdagi bog‘chada bola stulga skotchlab qo‘yilgani ortidan tarbiyachi va uning yordamchisi ishdan bo‘shatildi. 6-fevral kuni Sirdaryo viloyati Sardoba tumanidagi bog‘chada 6 yoshli bolaning tanasiga igna sanchib, tahdid qilingani aniqlandi.
6-yanvarda Toshkent viloyatidagi bog‘chada tarbiyachi bolalarning qulog‘idan tortib, bir necha marotaba urgani aniqlanib, ishdan olindi.
5-mart kuni Olmaliqdagi bog‘chada bolaning ustiga qaynoq suv to‘kilgandi.
Izoh (0)