Navoiy shahri hududini 19-iyul kuni tongda changsimon tutun qopladi. Xuddi shunday holat 13-iyulda ham kuzatilgandi. Aholi orasida bu vaziyat “Navoiyazot” AJ faoliyati bilan bog‘liq degan xabarlar tarqaldi. Navoiy viloyati Ekologiya boshqarmasi ham havoning ifloslanishida ushbu korxonani aybdor deb topdi. Korxona ayblovni rad etdi.
Navoiy viloyati Ekologiya, atrof muhitni muhofaza qilish boshqarmasi matbuot xizmatining 19-iyulda e’lon qilgan bayonotiga ko‘ra, shu kuni ertalab soat 7:00 dan 9:00 ga qadar tahliliy laboratoriya hamda “Navoiyazot” AJga qarashli Sanitar laboratoriyasi bilan jamiyat atrofidan tahlil ishlari olib borildi.
Korxona atrofidan atmosfera havosining tarkibi Ekolab (Gazoanalizator) apparati yordamida tahlil ishlari amalga oshirildi. Jumladan, “Navoiyazot” AJ va BXO atrofidan tahlil ishlari olib borilganda atmosfera tarkibida ammiak 1,4 barobar hamda vodorod sulfidi 16,8 barobar meʼyordan yuqoriligi aniqlangan.
Bundan tashqari, Navoiy viloyati Gidrometeorologiya boshqarmasining tahliliy laboratoriyasi tomonidan olingan tahlillar natijasi ko‘ra, 1-kuzatuv posti (Zulfiya ko‘chasi)dan tahlil ishlari olib borilganda uglerod ikki oksidi 1,04 marotaba, ammiak 1,1 barobar yuqoriligi, 2-kuzatuv postidan tahlil ishlari olib borilganda ammiak 1,2 barobar yuqoriligi aniqlangan.
“Navoiyazot” matbuot xizmati esa bunga javoban atmosfera ifloslanishi korxona faoliyati bilan bog‘liq degan fikrlarni asossiz va isbotlanmagan ekanini bildirdi. Ma’lum qilinishicha, korxona tomonidan atmosferani ifloslantiruvchi tashlamalar miqdorining me’yoridan oshmasligini nazorat qilish maqsadida 3, 23, 25-sexlarga 3 dona avtomatik gazоanalizator, jamiyatga qarashli sanatoriy-profilaktoriy hamda boshqarma hududiga 2 dona statsionar postlar o‘rnatildi va bunga “Navoiyazot” AJning o‘z mablag‘lari hisobidan 6 milliard 186 million so‘m mablag‘ sarflandi.
Shuningdek, atmosferaga manbalardan tashlanuvchi tashlamalarni tutib qolish maqsadida 3-sex donadorlash minorasiga 1 dona skrubber, 23-sex donadorlash minorasiga 4 dona skrubberlar o‘rnatilgan. Korxona hududi va atrofini nazorat qilish maqsadida 500 tadan ortiq zamonaviy kuzatuv kameralari o‘rnatilgan.
“Navoiyazot” yer sathidan 120 metr balandlikdagi 10-15 kilometr masofadagi jarayonni yaqqol ko‘rish imkoniyatini beruvchi ushbu kameralardan olingan videolarni e’lon qilib, 19 va 13-iyulda atmosferaning ifloslanishiga sabab bo‘lgan holat korxonaga taalluqli emasligini bildirdi.
“G‘arbiy hududdan (Navoiy xalqaro aeroporti tomondan) havoga ko‘tarilgan changsimon tutun shamol yo‘nalishi bo‘ylab korxona usti va atrofidan o‘tib keyin butun shaharga tarqalgan. Yuqoridagi tasvirlarda jarayon to‘liq aks etgan. Shundan kelib chiqib, fuqarolardan atrof-muhitning ifloslanishida korxonani ayblab, uning nufuziga salbiy ta’sir etadigan va asoslanmagan ayblovlarni qo‘ymasliklarini so‘rab qolamiz”, deyiladi raddiyada.
Bundan tashqari, “Navoiyazot” Ekologiya boshqarmasi korxonaga qarashli sanitar laboratoriya xodimlari bilan hamkorlikda tahlil o‘tkazganini rad etdi.
“Aslida esa o‘rganish ishlaridan jamiyat vakillari xabardor etilmagan. Shuningdek, atmosfera tarkibida ammiak 1,4 barobar hamda vodorod sulfidining 16,8 barobar meʼyordan yuqoriligi aniqlangani qayd etilgan. Aslida ammiak ham, vodorod sulfidi ham rangsiz, gazsimon modda bo‘lib, ko‘zga ko‘rinmaydi, Navoiy shahrini changsimon tutun qoplaganini esa aholi ko‘rib, guvohiga aylandi” deyiladi xabarda.
19-iyul kuni soat 7:30—8:00 oralig‘ida korxona mutaxassislari tomonidan o‘tkazilgan tekshiruv natijasida havo tarkibida ammiak mavjud emasligi aniqlangan.
“Jamiyatga qarashli tiomochevina sexi joriy yilning fevral oyidan buyon faoliyat yuritmayapti. Demak, atmosferaga vodorod sulfidi chiqqani haqidagi ma’lumot mutlaqo asossiz”, deyiladi korxona bayonotida.
Qayd etilishicha, uglerod ikki oksidi ko‘mirning chala yonishi natijasida hosil bo‘ladi, “Navoiyazot”AJ mahsulot ishlab chiqarishda ko‘mirdan umuman foydalanmaydi.
“Havoni ifloslantiruvchi omillarni bartaraf etishdan korxona ham manfaatdor. Shu bois viloyat Ekologiya boshqarmasi xodimlari bu vaziyatda yolg‘on ma’lumotlar bilan “Navoiyazot”AJni asossiz ayblamasdan holatning asl sababchilarini aniqlab, ularga nisbatan tegishli choralarni ko‘rishsa maqsadga muvofiq bo‘lardi”, deyiladi munosabatda.
Navoiy viloyati Ekologiya boshqarmasi 20-iyul kuni yana rasmiy xabar bilan chiqdi. Unda aytilishicha, shu kuni soat 06:20 da “Navoiyazot” AJ atrofi vizual o‘rganildi. Vizual o‘rganish davomida “Navoiyazot” AJning sexida ishlab chiqarish jarayonida atmosfera havosiga ifloslantiruvchi tashlamalar tashlangani aniqlandi. Shuningdek, shamol yo‘nalishi janubi-g‘arb tomonga yo‘nalgani uchun Navoiy shahar hududiga taʼsir ko‘rsatmagan.
Navoiy viloyati Ekologiya boshqarmasi “Navoiyazot” A.J hududida tekshiruvlarni o‘tkazish va yo‘l qo‘yilayotgan kamchiliklarga aniqlik kiritish maqsadida Prezident huzuridagi Tadbirkorlik huquqlari va qonuniy manfaatlarini himoya qilish vakili bilan kelishilgan holda tekshiruvlarni o‘tkazishini hamda tekshirish ishlari yakuni bilan qo‘shimcha axborot berilishini maʼlum qildi.
Izoh (0)