Toshkent havoning ifloslanish darajasi bo‘yicha 17-mayda dunyoning yirik shaharlari orasida 4-o‘ringa chiqdi.
IQAir portaliga ko‘ra, soat 08:00 atrofida Toshkent havosida mayda PM2,5 dispers zarralarining konsentratsiyasi 73 mkg/m3 ni tashkil etgan – bu JSST tomonidan tavsiya etilgan o‘rtacha havo sifati ko‘rsatkichidan 14,6 barobarga ko‘p. Hozirda poytaxt havosi sifati “zararli” tasnifda turibdi.
Reytingda 1-o‘rinni Kongoning Kinshasa shahri egallagan — PM2,5 dispers zarralarining konsentratsiyasi 112 mkg/m3. Hindistonning Dehli shahri 2-pog‘onada — 110 mkg/m3. Uchlikka Pokistonning Lahor shahri yakun yasamoqda — 76,7 mkg/m3.
Jahon sog‘liqni saqlash tashkilotiga ko‘ra, havo ifloslanishi ko‘rsatkichlari orasida salomatlik uchun eng katta xavf tug‘diradigani aynan PM2,5 dispers zarralaridir.
- Eslatib o‘tamiz, 15-mart kuni soat 08:30 holatiga ko‘ra, Toshkent havosi dunyoning yirik shaharlari orasida ifloslanish reytingida 1-o‘rinni egallagandi.
- Sanepidqo‘mita changli havoda qilish kerak bo‘lgan qator tavsiyalar bergan.
- Ekologiya, atrof-muhitni muhofaza qilish va iqlim o‘zgarishi vazirligi O‘zbekistonning geografik va iqlimiy xususiyatlaridan kelib chiqqan holda Jahon sog‘liqni saqlash tashkiloti ko‘rsatmalariga erishish qiyinligini ma’lum qilgandi.
- Vazirlik Sog‘liqni saqlash vazirligi bilan hamkorlikda O‘zbekistonda atmosfera havosi sifati monitoringi bo‘yicha milliy platforma va mobil ilovani ishlab chiqishga qaratilgan loyihani amalga oshirmoqda.
Izoh (0)