O‘zbekiston Jahon savdo tashkilotiga a’zo bo‘lish bo‘yicha Shveysariya bilan ikki tomonlama muzokaralarni yakunladi. Bu haqda prezidentning JST bo‘yicha vakili Azizbek Urunov ma’lum qildi.
21-iyul kuni Jenevada tomonlar O‘zbekistonning JSTga qo‘shilish jarayoni doirasida Shveysariya bilan bozorga kirish bo‘yicha ikki tomonlama muzokaralarni yakunlash to‘g‘risidagi protokolni imzoladi.
“O‘zbekiston va Shveysariya jamoalariga mashaqqatli hamda konstruktiv mehnati uchun minnatdorchilik bildiraman. Uzun ro‘yxat tugadi, endi teskari sanoq boshlandi”, deb yozdi Urunov LinkedIn’da.
Shveysariya O‘zbekiston bilan bozorga kirish bo‘yicha ikki tomonlama muzokaralarni yakunlash to‘g‘risidagi protokolni imzolagan 25-davlat bo‘ldi. May oyining oxirlarida Buyuk Britaniya bu boradagi muzokaralarni muvaffaqiyatli yakunlangan 24-davlat bo‘lgandi.
Davlat rahbarining alohida nazorati asosida 2023-yildan boshlab JSTga aʼzo bo‘lish choralari ko‘rilmoqda. Ikki tomonlama muzokaralar doirasida 33 ta mamlakat bilan bozorga kirish bo‘yicha muzokaralar olib borilgan bo‘lib, bugungi kunga qadar 25 tasi bilan muzokaralar yakunlandi.
Shavkat Mirziyoyev 2025-yil may oyida o‘tkazgan yig‘ilishda O‘zbekistonning JSTga aʼzo bo‘lish jarayonini jadallashtirish bo‘yicha topshiriq bergandi. Unga ko‘ra, 2025-yilda qolgan 8 ta mamlakat bilan ikki tomonlama muzokaralarni yakunlash lozim.
O‘zbekiston 2026-yilgacha Jahon savdo tashkilotiga aʼzo bo‘lmoqchi. Shavkat Mirziyoyev O‘zbekistonning ushbu tashkilotga a’zo bo‘lishi chuqur o‘ylangan va uzoqni ko‘zlagan tanlov ekanligini ta’kidlagandi.
Mamlakatda bojxona tartibotlari, eksport-import qoidalari hamda intellektual mulk sohasidagi mexanizmlar bosqichma-bosqich JST standartlariga moslashtirildi, davlat ulushi mavjud bo‘lgan 6 ta korxonada eksklyuziv huquqlar bekor qilindi.
Izoh (0)