Polshaning Svinoystse (Świnoujście) shahri yaqinida, Boltiq dengizi sohilida yangi neft va tabiiy gaz koni topildi. Bu haqda Kanadaning Central European Petroleum (CEP) kompaniyasi xabar berdi.
Yangi kon Wolin East 1 nomli quduqda aniqlangan bo‘lib, uning chuqurligi 2 ming metrdan ortiq. Dastlabki hisob-kitoblarga ko‘ra, bu kon 22 million tonna neft va 5 milliard kub metr gaz zaxirasiga ega. Uchastkadagi umumiy zaxiralar qariyb 33 milliard tonna neft va 27 milliard kub metr gazni tashkil etadi. Bu mamlakatdagi eng yirik uglevodorod koni, shuningdek, Yevropaning so‘nggi 10 yildagi eng yirik neft koni hisoblanadi.
Bu Central European Petroleum uchun ham, Polsha energetika sektori uchun ham tarixiy lahza, deydi CEP bosh direktori Rolf Skar.
Konning ishga tushirilishi energetik xavfsizlikni mustahkamlashiga va uglevodorod importiga bo‘lgan qaramlikdan xalos etishga ishonch bildirilmoqda. Polshaning 2023-yilda mavjud neft zaxiralari 20,2 million tonna deb baholangan edi. “Wolin East” koni esa ushbu ko‘rsatkichni ikki baravardan ko‘proqqa oshiradi va Polshani ichki neft ta’minoti borasida mustahkamroq pozitsiyaga olib chiqadi.
Ma’lumot o‘rnida, 2020-yilda, Polshaning Lyubush voyevodaligida mis va kumush konlari ham topilgan edi. Bu kashfiyot Kanadaning Copper Copper Corp kompaniyasi tomonidan amalga oshirilgan bo‘lib, qazilma boyliklarning umumiy qiymati 60 milliard AQSH dollarga baholangan.
Central European Petroleum Ltd. — bu Kanadada ro‘yxatdan o‘tgan, lekin norvegiyalik investorlar nazorati ostidagi kompaniya bo‘lib, dastlab Yevropa Ittifoqi, xususan, Germaniyada uglevodorodlarni qidirish maqsadida tashkil etilgan.
Izoh (0)