Toshkent havoning ifloslanish darajasi bo‘yicha 15-aprelda dunyoning yirik shaharlari orasida 2-o‘ringa chiqdi.
IQAir portaliga ko‘ra, soat 11:00 atrofida Toshkent havosida mayda PM2,5 dispers zarralarining konsentratsiyasi 81,5 mkg/m3 ni tashkil etgan – bu JSST tomonidan tavsiya etilgan o‘rtacha havo sifati ko‘rsatkichidan 16,3 barobarga ko‘p. Hozirda poytaxt havosi sifati “zararli” tasnifda turibdi.
Reytingda 1-o‘rinni Hindistonning Dehli shahri egallagan — PM2,5 dispers zarralarining konsentratsiyasi 98 mkg/m3. Bangladeshning Dakka shahri 3-pog‘onada — 74,1 mkg/m3. Reytingdagi o‘ntalikdan, shuningdek, Katmandu (Nepal), Kalkutta (Hindiston), Lahor (Pokiston), Akkra (Gana), Yangon (Myanma), Bog‘dod (Iroq), Chiang-May (Tailand) egallagan.
Jahon sog‘liqni saqlash tashkilotiga ko‘ra, havo ifloslanishi ko‘rsatkichlari orasida salomatlik uchun eng katta xavf tug‘diradigani aynan PM2,5 dispers zarralaridir.
Eslatib o‘tamiz, 15-mart kuni soat 08:30 holatiga ko‘ra, Toshkent havosi dunyoning yirik shaharlari orasida ifloslanish reytingida 1-o‘rinni egallagandi. Sanepidqo‘mita changli havoda qilish kerak bo‘lgan qator tavsiyalar bergan. Ekologiya, atrof-muhitni muhofaza qilish va iqlim o‘zgarishi vazirligi O‘zbekistonning geografik va iqlimiy xususiyatlaridan kelib chiqqan holda Jahon sog‘liqni saqlash tashkiloti ko‘rsatmalariga erishish qiyinligini ma’lum qilgandi. Vazirlik Sog‘liqni saqlash vazirligi bilan hamkorlikda O‘zbekistonda atmosfera havosi sifati monitoringi bo‘yicha milliy platforma va mobil ilovani ishlab chiqishga qaratilgan loyihani amalga oshirmoqda.
Izoh (0)