Klublar o‘rtasidagi Jahon chempionati: 2-tur uchrashuvlari boshlandi. 19-iyundan 20-iyunga o‘tar kechasi Klublar o‘rtasidagi Jahon chempionati 2-tur doirasida yana uchta bahs bo‘lib o‘tdi.
A guruhidagi “Inter Mayami” — “Portu” o‘yini ancha qiziqarli kechdi. Garchi Yevropa qit’asi vakillari birinchi bo‘lib gol urgan bo‘lsa-da, AQSh klubi ikki bor javob qaytarib, yakunda g‘alabani qo‘lga kiritdi — 2:1.
Hisob 8-daqiqada “Portu”ning 21 yoshli futbolchisi Samu tomonidan ochildi. U hakam tomonidan belgilangan 11 metrlik jarima zarbasini aniq amalga oshirib, jamoasini oldinga olib chiqdi.
Ikkinchi bo‘lim boshida “Inter Mayami” javob gollarini kiritdi. Avvaliga Telasko Segoviya hisobni tenglashtirdi, so‘ngra Leo Messi jarima zarbasidan foydalangan holda jamoasini hisobda oldinga olib chiqdi.
Uchrashuvdagi mazkur natija o‘yin oxirigacha o‘zgarmadi. “Inter Mayami” 2:1 hisobida zafar quchib, turnirdagi ilk g‘alabasini qo‘lga kiritdi va hisobiga 3 ochko yozdirib qo‘ydi.
2-turdan so‘ng A guruhida “Palmeyras” va “Inter Mayami” 4 ochkodan jamg‘arib, peshqadamlik qilmoqda. “Portu” hamda “Al-Ahli” hisobida esa bir ochkodan mavjud.
B guruhida ham 2-tur bellashuvlari yakunlandi. Ilk turda “PSJ”dan 0:4 hisobida mag‘lubiyatga uchragan “Atletiko” ikkinchi turda o‘z so‘zini ayta oldi. Madridliklar AQShning “Sietl Saunders” klubiga qarshi maydonga tushib, 3:1 hisobida g‘alaba qozondi.
Hisob 11-daqiqada Pablo Barrios tomonidan ochildi. 47-daqiqada esa Aksel Vitsel “Atletiko”ning ikkinchi goliga mualliflik qildi. Oradan uch daqiqa o‘tib, Albert Rusnak “Sietl” foydasiga gol urdi. Biroq 55-daqiqada “Atletiko” yana hujumni gol bilan yakunlab, hisobni 3:1 ko‘rinishiga olib keldi.
O‘yinda boshqa gollar kiritilmadi va Madrid klubi ushbu g‘alaba evaziga o‘z hisobiga 3 ochko qo‘shib qo‘ydi.
Guruhdagi ikkinchi bahs ham hayajonli o‘tdi. Birinchi turda yirik hisobda g‘alaba qozongan “PSJ” bu safar kutilmaganda “Botafogo”ga imkoniyatni boy berdi — 0:1.
Yagona gol 36-daqiqada Igor Jezus tomonidan kiritildi. O‘yinning qolgan daqiqalari ham qizg‘in o‘tdi, biroq boshqa gollar kiritilmadi.
Ikki tur yakuniga ko‘ra, “Botafogo” 6 ochko bilan keyingi bosqich masalasini deyarli hal qilib bo‘ldi. “PSJ” va “Atletiko” hisobida 3 ochkodan mavjud. “Sietl Saunders” esa hozircha ochkosiz qolmoqda.
Klublar o‘rtasidagi Jahon chempionati
2-tur
A guruhi
“Inter Mayami” — “Portu” 2:1
Gollar: 0:1 — Samu (8), 1:1 — Segoviya (47), 2:1 — Messi (54).
“Sietl Saunders” — “Atletiko” 1:3
Gollar: 0:1 — Barrios (11), 0:2 — Vitsel (47), 1:2 — Rusnak (50), 1:3 — Barrios (55).
“PSJ” — “Botafogo” 0:1
Gol: 0:1 — Igor Jezus (36).
Izoh (0)