Dunyo va o‘zbek sportiga oid 29-noyabr tongining eng muhim xabarlari dayjesti bilan tanishing.
O‘zbekiston
“Turon” klubi prezidenti vazifasidan ozod etildi
Superliga so‘nggi turi doirasida kechgan “Turon” — “Andijon” uchrashuvidagi keyin yaypanliklar klubi rahbariyati va ta’sischilari ishtirokida yig‘ilish bo‘lib o‘tgan. Yig‘ilish natijasiga ko‘ra, klub prezidenti Abduvahob Ahmadaliyev o‘z arizasiga ko‘ra egallab turgan lavozimidan ozod etilgan.
Tokio Olimpiadasi sovrindori “Katta dubulg‘a”da bronza medaliga ega chiqdi
O‘zbekistonlik dzyudosi Davlat Bobonov BAAning Abu-Dabi shahrida bo‘lib o‘tgan “Katta dubulg‘a” tasnifiga kiruvchi musobaqada bronza medaliga ega chiqdi. Bobonov bronza uchun kechgan hal qiluvchi bahsda fransiyalik Fransis Damyeni yengdi va sovrindorlar qatoridan joy oldi.
Bu orqali o‘zbekistonlik sportchi 500 reyting ochkosiga ega bo‘ldi. Bobonov yarim finalda rossiyalik Mansur Lorsanovga yutqazib qo‘ygandi.
Avvalroq ushbu musobaqada Hikmatulloh To‘rayev kumush medaliga ega chiqqandi.
Jahon
“Oltin to‘p” sovrini bugun o‘z egasini topadi
Parijdagi “Teatre dyu Shatle”da “Oltin to‘p”—2021 sovrinini topshirish marosimi bo‘lib o‘tadi. Marosim Toshkent vaqti bilan 29-noyabrdan 30-noyabrga o‘tar kechasi 00:30 da boshlanadi.
Sovrin uchun 30 nafar nomzod e’lon qilingan. Biroq asosiy da’vogarlar sifatida Lionel Messi (“PSJ”), Robert Levandovski (“Bavariya”) va Jorjinyo (“Chelsi”) ko‘rilmoqda.
Eslatib o‘tamiz, 2020-yilda koronavirus pandemiyasi sabab “Oltin to‘p” topshirish marosimi o‘tkazilmagan edi.
IFFHS yilning eng yaxshilarini e’lon qildi
Xalqaro futbol tarixi statistikasi federatsiyasi (IFFHS) 2021-yilning eng yaxshi futbolchisi va darvozaboni nomini ma’lum qildi.
Eng yaxshi futbolchi sifatida “Bavariya” forvardi Robert Levandovski e’tirof etilgan. Polshalik futbolchi 150 ochko to‘plagan. Ikkinchi o‘rinda “PSJ” forvardi Lionel Messi (105) qayd etilgan bo‘lsa, “Chelsi” yarim himoyachisi Jorjinyo (40) kuchli uchlikka yakun yasagan.
IFFHS talqiniga ko‘ra 2021-yilning eng yaxshi futbolchilari:
- Robert Levandovski (“Bavariya”) — 150 ochko
- Lionel Messi (“PSJ”) — 105
- Jorjinyo (“Chelsi”) — 40
- Kevin de Bryuyne (“Manchester Siti”) — 35
- Muhammad Saloh (“Liverpul”) — 20
- Kilian Mbappe (“PSJ”) — 20
- Krishtianu Ronaldu (“Manchester Yunayted”) — 15
- Ngolo Kante (“Chelsi”) — 10
- Janluiji Donnarumma (“PSJ”) — 10
- Erling Holand (“Borussiya D”) — 5.
Shuningdek, kuchli beshlikdan “Aston Villa” futbolchisi Emiliano Martines (25) va “Atletiko” yetakchisi Yan Oblak (20) o‘rin olgan.
Serxio Ramos qaytdi, Neymarda esa jiddiy jarohat
2021-yilgi yozgi transfer oynasida erkin agent maqomida “PSJ” safiga o‘tgan Serxio Ramos Liga 1 16-turi doirasida kechgan “Sent-Etyen”ga qarshi bahsda debyut qildi. Himoya jamoaga kelganidan beri jarohatidan qutulolmayotgandi. Ramos uchrashuvda to‘liq harakat qilgan.
Mazkur bahsda “PSJ” hujumchisi Neymar raqib bilan bo‘lgan to‘qnashuvdan keyin boldir oshig‘ini jiddiy shikastlab oldi. Bu jarohatdan keyin Neymar maydondan olib chiqib ketildi. Hozircha jarohat qay darajada jiddiy ekani ma’lum emas.
“Tiklanishni boshlayman. Afsuski, bu sportchi hayotining bir qismi. Endi boshni ko‘tarish va oldinga intilish kerak. Yanada kuchliroq bo‘lib qaytaman”, — deya post qoldirdi Neymar jarohatdan keyin.
“Palmeyras” — Libertadores Kubogi sohibi
Finalda “Flamengo”ni taslim etgan “yashil-oqlar” o‘z tarixida uchinchi marta va ketma-ket ikkinchi bor ushbu sovringa ega chiqdi. O‘tgan mavsum “Palmeyras” “Santos”ni yengib, kubok egasiga aylangandi.
Shu tariqa klublar o‘rtasidagi JCh—2021 musobaqasining barcha ishtirokchilari nomi ma’lum bo‘ldi. “Palmeyras”dan tashqari unda “Chelsi” (Angliya), “Al-Hilol” (Saudiya Arabistoni), “Al-Ahli” (Misr), “Monterrey” (Meksika), “Oklend” (Yangi Zelandiya) va “Al-Jazira” (BAA) jamoalari qatnashadi. Musobaqa 2022-yil boshida BAAda bo‘lib o‘tadi.
Izoh (0)