Futbol bo‘yicha Ispaniya Kubogi finalida “Barselona” 17-aprel, shanba kuni Bilbaoning “Atletik”i bilan bahs olib bordi va 4:0 hisobida g‘alaba qozondi.
Kataloniyaliklarning gollaridan ikkitasiga Lionel Messi mualliflik qildi. Natijada Messi Ispaniya Kubogining 119 yillik tarixida 7 ta final uchrashuvida gol urgan ilk futbolchiga aylandi.
Qayd etish joiz, Messi Ispaniya Kubogi finallarida 10 marta ishtirok etib, 9 ta gol urdi. Argentinalik hujumchi mazkur musobaqa finallarida eng ko‘p gol urgan “Atletik” vakili Telmo Sarraning rekordini ham yangiladi. Sarra vaqtida Ispaniya Kubogining hal qiluvchi bahslarida 8 ta gol urgandi.
Shuningdek, Messi, Serxio Buskets va Xerard Pike “Barselona” safida Ispaniya Kubogini 7 martadan qo‘lga kiritib, “Atletik” sobiq hujumchisi Agustin Gainsaning rekordini takrorladi.
Ma’lumot uchun, “Barselona” Ispaniya Kubogini umumiy hisobda 31 marta qo‘lga kiritgan.
Messi uchun bu “Barselona”da faoliyatidagi 35-sovrin sifatida tarixga kirdi. Ketma-ket 13 mavsumdan beri 30 tadan kam bo‘lmagan gol urayotgan Messi kataloniyaliklar safida quyidagi sovrinlarni qo‘lga kiritgan:
- La Liga — 10 marta
- Ispaniya Kubogi — 7 marta
- Ispaniya Superkubogi — 8 marta
- Chempionlar Ligasi — 4 marta
- Yevropa Superkubogi — 3 marta
- Klublar o‘rtasidagi JCh — 3 marta
Izoh (0)