“Barselona” qishda Lionel Messi bilan shartnoma imzolamoqchi.
Diario Sport nashrining xabariga ko‘ra, kataloniyaliklar qishki transfer oynasidan unumli foydalanmoqchi.
Iqtisodiy dastaklar faollashtirilgandan so‘ng “ko‘k-anorranglilar”dan moliyaviy to‘siqlar olib tashlandi. Avval “Barselona” La Liga tomonidan qo‘yilgan to‘siq (1/4, ya’ni har bir iqtisod qilingan 4 yevroning 1 yevrosini ishlatish mumkin) asosida ish ko‘rgan bo‘lsa, yozdan buyon jamoa 1/1 ko‘rinishidagi (har bir ishlab topilgan yevroni sarflash mumkin) qoidaga amal qilishni boshladi.
2023-yil yozida “Barselona” yana 1/4 qoidasiga qaytadi va Messining transferini amalga oshirishni iloji bo‘lmay qoladi. Shuning uchun kataloniyaliklar rahbari Xoan Laporta argentinalikni qishda jamoaga qaytarmoqchi.
Ushbu transferni amalga oshirish bir nechta sabablarga ko‘ra qiyin kechadi. Birinchidan, “PSJ” Messi bilan mavsum o‘rtasida xayrlashishni istamaydi. Ikkinchidan, klublar o‘rtasidagi munosabat yaxshi emas, parijliklar Leoni qo‘yib yubormasligi mumkin. Uchinchidan, Messi bor e’tiborini JCH—2022ga qaratgan.
Agar ushbu sabablarga qaraladigan bo‘lsa, argentinalikning “Barselona”ga o‘tishi ilojsiz.
Hozirda jamoa Messi bilan to‘g‘ridan to‘g‘ri aloqaga chiqmagan. Laportaning tarafdorlari aloqa o‘rnatishga uringan, biroq na Messi, na “PSJ” prezidenti Nosir al-Helayfi bunga javob bergan.
Laporta “Oltin to‘p” marosimi uchun Parijga tashrif buyurgan, shu orada Messi bilan uchrashishni ham maqsad qilgan. Ammo buning ilojini qila olmagan.
Joriy mavsum 35 yoshli futbolchi barcha musobaqalarda 16 ta o‘yinda ishtirok etib, 11 ta gol va 12 ta golli uzatmaga mualliflik qilgan.
Izoh (0)