Amerika Qo‘shma shtatlari ma’muriyati Los-Anjelesdagi vaziyatni barqarorlashtirish uchun qat’iyroq choralar ko‘rish zarur bo‘lsa, ikkilanmasligini bildirdi. Bu haqda AQSH bosh prokurori Pem Bondi CNN jurnalistiga ma’lum qildi.
“Hozirda Kaliforniyada vaziyatimiz yaxshi. Oldinga siljishdan cho‘chimaymiz. Agar yana qo‘shimcha choralar ko‘rish kerak bo‘lsa, biz ikkilanmaymiz”, deya javob berdi u AQSH Qurolli kuchlaridan mamlakatda tartibni saqlash uchun foydalanishga imkon beruvchi qo‘zg‘olonlarni bostirish to‘g‘risidagi qonunni qo‘llash imkoniyati haqidagi savolga.
Uning so‘zlariga ko‘ra, ma’muriyat Los-Anjelesda joriy etilgan komendantlik soati keskinlikni pasaytirishiga umid qilmoqda. Biroq, u federal hokimiyat ham zarur hollarda harakat qilishga tayyor ekanligini ta’kidladi.
The New York Times xabariga ko‘ra, 11-iyun kuni Los-Anjeles, Mishn-Vyexo (Kaliforniya shtati), Yudjin (Oregon shtati), Roli (Shimoliy Karolina shtati), San-Antonio (Texas shtati), Sietl (Vashington shtati), Sent-Luis (Missuri shtati) shaharlarida ma’muriyatning migratsiya siyosatiga qarshi yangi norozilik namoyishlari o‘tkazilishi rejalashtirilgan. Bir qator shaharlar ma’murlari ushbu namoyishlarga tayyorgarlik ko‘rmoqda.
Chorshanba kuni Los-Anjeles ko‘chalarida Milliy gvardiya xizmatchilariga qo‘shiladigan 700 nafar dengiz piyodasi navbatchilik qiladi. Dengiz piyodalari va milliy gvardiyachilar AQSH Immigratsiya va bojxona politsiyasi (ICE) xodimlarini o‘z vazifalarini bajarayotganda qo‘riqlaydi, ammo hibsga olish jarayonlarida ishtirok etmaydi.
Ichki xavfsizlik vazirligi 9-iyun kuni ICE migratsiya qonunchiligini buzganlik uchun kuniga 2 ming kishini hibsga olayotganini ma’lum qildi. AQShning avvalgi prezidenti Jo Bayden davrida bu ko‘rsatkich 2024-yilda kuniga 311 kishini tashkil etgan.
Izoh (0)