Rossiya Ukraina dronlarini urib tushirish uchun Xitoyda ishlab chiqarilgan lazerdan foydalanmoqda. Bu haqda The Telegraph xabar berdi.
Rossiya “Sokin ovchi” nomli past balandlikdagi lazerli mudofaa tizimidan foydalanayotgani aks etgan videolar tarqaldi. Bu Rossiya Ukrainaga qarshi keng ko‘lamli urush davrida Xitoydan olgan eng muhim qurilmalardan biridir. Ushbu lazer dushman dronlarini aniqlash, kuzatish va yo‘q qilishga mo‘ljallangan. Uni yo‘ltanlamas tomiga o‘rnatish mumkin va transport vositasi ichidan boshqarish imkoniyati mavjud.
Tizim 4,98 kilometr masofadagi nishonlarni aniqlay oladi, dronlarning kuzatuv tizimini 3,2 kilometr masofada izdan chiqara oladi va 1,6 kilometr masofada ularni urib tushirishi mumkin.
30 kilovattli lazer 1000 metr masofada 5 mm qalinlikdagi po‘lat plastinani teshib o‘ta oladi. Nishonni aniqlash va yo‘q qilish oralig‘ida atigi sakkiz soniya o‘tadi, deyiladi xabarda.
Rossiya Telegram kanallarida tarqalgan videoda lazer uzoqdagi po‘lat plastinaga o‘q uzib, uni bir nechta teshiklar bilan teshgani aks etgan.
Video davomida ekran ikkiga bo‘linib, lazerning ukrainalik dronlarni yo‘q qilayotgani ham namoyish etilgan. Tarmoqlarda bu dronlar Shedrik va Skywalker X8 ekani aytilmoqda.
Izoh (0)