Oliy Majlisi Senati a’zosi, O‘zbekiston Qahramoni Azim Latipov 6-iyun kuni 74 yoshida vafot etdi.
“Azim Shofirkon yulduzi” fermer xo‘jaligi rahbari Azim Latipov mamlakatda fermerlik harakatini rivojlantirishda faolligini namoyon etgan. 2005–2019-yillarda Buxoro viloyatidan saylangan Oliy Majlis Senati a’zosi sifatida faoliyat olib borib, hududlar manfaatlarini qabul qilingan qonun va qarorlarda ifodalash hamda mahalliy muammolarni hal qilish ishlariga o‘zining hissasini qo‘shgan.
Azim Latipov mamlakat va xalq oldidagi xizmatlari uchun O‘zbekiston Qahramoni unvoniga sazovor bo‘lgan, “Shuhrat medali” bilan taqdirlangan.
Azim Latipov — O‘zbekiston Qahramoni unvoniga sazovor bo‘lgan taniqli dehqon, chorvachilik mexanigi va davlat arbobi edi. U 1951-yil 6-iyun kuni Buxoro viloyatining Shofirkon tumanida tug‘ilgan. Mehnat faoliyatini 1971-yilda chorvachilik mexanigi sifatida boshlagan. U paxtachilik, g‘allachilik va chorvachilik sohalarida faoliyat yuritib, dehqonchilikda eski qovun navlarini qayta yaratish va hosildorlikni oshirishga hissa qo‘shgan.
1996-yilda “Shuhrat” medali bilan taqdirlangan, 2002-yilda esa O‘zbekiston Qahramoni unvoniga sazovor bo‘lgan. Uch marta Oliy Majlis Senati a’zoligiga saylangan va 2004–2019-yillarda Senatning Agrar, suv masalalari va ekologiya qo‘mitasi a’zosi sifatida faoliyat olib borgan. 2004-yildan boshlab Xalq deputatlari Buxoro viloyati kengashi deputati sifatida ham xizmat qilgan.
Izoh (0)