Koreya Respublikasining yangi saylangan prezidenti Li Je Myong rafiqasi bilan qasamyod qilish marosimiga tashrif buyurdi. Inauguratsiya marosimi cho‘zib o‘tirilmasdan, saylov natijalari e’lon qilinishi bilanoq — an’anaviy ikki oylik o‘tish davrisiz o‘tkazildi. Bu haqda Yonhap nashri xabar bermoqda.
3-iyun kuni Janubiy Koreyada muddatidan oldin prezident saylovi o‘tkazildi. Prezidentlik uchun asosiy nomzodlar Li Je Myong va uning bosh raqibi, hukmron konservativ “Xalq kuchi” partiyasidan Kim Mun Su edi. Saylovlar yakunlanishiga bir soat qolganida saylovchilar faolligi 28 yil davomidagi rekord daraja — 77,8 foizni tashkil etdi.
Ma’lumotlarga ko‘ra, 100 foiz saylov byulletenlari qayta ishlangandan so‘ng, muxolifat nomzodi Li Je Myong 49,42 foiz ovozni qo‘lga kiritgan. Uning raqibi, hukmron konservativ “Xalq kuchi” partiyasidan nomzod Kim Mun Suga esa fuqarolarning 41,15 foizi ovoz bergan.
Li Je Myong muddatidan oldin o‘tkazilgan saylovda g‘alaba qozondi. U shunchaki g‘alaba qozonibgina qolmadi. Balki mamlakat tarixidagi eng ko‘p ovozni — 17 280 000 ta ovozni to‘pladi. Saylovchilar aniq talablar bilan saylov uchastkalariga kelishdi.
Bu saylovlar o‘tgan yilning dekabr oyida harbiy holat joriy etilgani sababli uning sobiq raqibi Yun Sok Yelga impichment e’lon qilinganidan so‘ng o‘tkazildi. Konstitutsiyaviy sud bu hodisa mamlakatda so‘nggi o‘n yilliklardagi eng jiddiy siyosiy inqirozni keltirib chiqardi, deb hisobladi.
“Men xalq oldida tantanali qasamyod qilamanki, konstitutsiyaga rioya qilgan holda, millatni himoya qilib, vatanni tinch yo‘l bilan birlashtirishga intilaman, xalqning erkinligi va farovonligiga ko‘maklashaman hamda milliy madaniyatimizni rivojlantirib, prezidentlik vazifamni vijdonan bajaraman”, dedi inauguratsiya marosimida Li Je Myong.
Ta’kidlanishicha, mahalliy gazetalarning bugungi sonining birinchi sahifalari faqat yangi prezident haqida. Aynan u AQSH prezidenti Donald Trampning tarif siyosati va Shimoliy Koreya yadro dasturi bilan bog‘liq muammolarni hal qilishi kerak bo‘ladi.
Li Je Myong o‘zining inauguratsiya nutqida global muammolar va o‘zgarishlar sharoitida amaliy diplomatiyaning muhimligini ta’kidlagan. U mavjud inqirozlarni mamlakat manfaatlarini ta’minlash imkoniyatlariga aylantirish va’dasini bergan.
Ma’lum qilinishicha, Li Je Myongning birinchi suhbati AQSH prezidenti Donald Tramp bilan bo‘lishi kutilmoqda.
Izoh (0)