Shavkat Mirziyoyev Li Je Myongni Janubiy Koreya yangi prezidenti etib saylangani bilan tabrikladi va eng ezgu tilaklarini bildirdi, deb xabar bermoqda prezident matbuot kotibi.
Davlat rahbari o‘z maktubida Li Je Myong rahbarligida Koreya Respublikasining intellektual va iqtisodiy qudrati yanada o‘sishiga, xalqaro maydondagi obro‘-e’tibori va nufuzi mustahkamlanishiga ishonch bildirdi.
“Biz Koreya Respublikasi bilan do‘stona va keng qamrovli aloqalarni yangi bosqichga ko‘tarishga alohida e’tibor qaratamiz. Aminmanki, sizning prezidentlik davringizda alohida strategik sheriklik munosabatlarimiz barcha ustuvor sohalarda jadal rivojlanadi”, deyiladi maktubda.
Shavkat Mirziyoyev ikki mamlakat o‘rtasidagi ko‘p qirrali va uzoq muddatli munosabatlarni yanada mustahkamlash maqsadida Li Je Myongni o‘ziga qulay vaqtda O‘zbekistonga rasmiy tashrif bilan kelishga taklif etdi.
Saylov 3-iyun kuni o‘tkazildi. Li Je Myong Birlashgan demokratik partiyadan nomzod sifatida Janubiy Koreyadagi navbatdan tashqari prezidentlik saylovida g‘alaba qozondi. Li Je Myong saylovoldi dasturida Shimoliy Koreya bilan aloqa kanallarini qayta tiklash va Koreya iqtisodiyotini jonlantirish maqsadida Koreyalararo hamkorlikni rivojlantirishni va’da qilgandi. Shu bilan birga, agar saylansa, Pxenyanning “assimetrik tahdidlariga javob berish uchun tayyorgarlikni” kuchaytirishini ta’kidlagandi.
Izoh (0)