Toshkent shahar Yunusobod tumanida Germaniyaga ishga yuborishini aytib, 9 kishini chuv tushirganlar ushlandi. Bu haqda Iqtisodiy jinoyatlarga qarshi kurashish departamenti xabar berdi.
Keltirilishicha, holat Bosh prokuratura huzuridagi departamentning Yunusobod tumani bo‘limi tomonidan o‘tkazilgan tergovga qadar tekshiruvda aniqlangan. “F.A.” MCHJ rahbari J.B. va menejeri A.A. (muqaddam sudlanganlar) fuqarolarni go‘yoki Germaniya davlatiga ishga yuborishi haqida internet ijtimoiy tarmoqlariga e’lonlar joylashtirgan.
Ular ushbu e’lon bo‘yicha murojaat qilgan 9 nafar fuqaro bilan soxta shartnomalar tuzib, ulardan jami 12 500 AQSH dollari va 73,2 mln so‘m pullarni firibgarlik yo‘li bilan qo‘lga kiritgan.
Mazkur holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Xorijda ishlayotgan o‘zbekistonliklar
2025-yil boshi holatiga 1 340 000 (1,34 mln) nafar o‘zbekistonlik xorijda mehnat faoliyati bilan shug‘ullanamoqda. Ulardan 20 foizini ayollar tashkil qiladi.
Rossiyadagi o‘zbek migrantlar soni 2023-yil oxirida taxminan 1 mln 200 ming kishi edi, 2024-yil oxirida esa bu raqam taxminan 698 mingga tushdi, ya’ni Rossiya hali ham yetakchi davlat bo‘lsa‑da, lekin raqamlar sezilarli kamaygan.
Hukumat 2025-yilda Germaniya, Buyuk Britaniya, Yaponiya, Koreya Respublikasi, Kanada, Isroil, Saudiya Arabistoni, BAA va Polsha kabi iqtisodi rivojlangan 21 davlatda 200 mingdan ortiq o‘zbekistonlikni ish bilan ta’minlashni rejalashtirmoqda.
O‘zbekistonliklar uchun Germaniyaga migratsiya masalasida bir qator yengilliklar ishlab chiqilmoqda. Germaniyada transport, muhandislik sohalarida ishlash istagida bo‘lgan fuqarolar ushbu davlat standartlari asosida Kambag‘allikni qisqartirish va bandlik hamda Transport vazirliklari qoshidagi kasbiy ta’lim muassasalarida germaniyalik mutaxassislar tomonidan til va kasbga o‘rgatiladi.
Bu borada firibgarliklar
Toshkentda fuqaroni Yaponiyaga ishga jo‘natish evaziga 7,4 ming dollar olgan shaxs, Samarqandda to‘rt kishini Polshaga ishga yuborishi evaziga jami 10 700 dollarni firibgarlik yo‘li bilan qo‘lga kiritgan shaxsga jinoyat ishi qo‘zg‘atilgandi. Samarqand, Jizzax va Toshkentda fuqarolarni xorijga ishga yuborishni vaʼda qilgan shaxslar ushlangandi.
Prezidentning “Xorijda mehnat faoliyatini amalga oshirish jarayonlarini tartibga solish bo‘yicha qo‘shimcha chora-tadbirlar to‘g‘risida”gi qarori qabul qilingan bo‘lib, unga ko‘ra 2024-yil 1-noyabrdan xorijiy ish beruvchilar tomonidan taklif qilinayotgan ish o‘rinlari haqidagi barcha maʼlumotlar Migratsiya agentligining elektron platformasi, OAV va ijtimoiy tarmoqlarda ochiq eʼlon qilib boriladi.
Izoh (0)