Тошкент шаҳар Юнусобод туманида Германияга ишга юборишини айтиб, 9 кишини чув туширганлар ушланди. Бу ҳақда Иқтисодий жиноятларга қарши курашиш департаменти хабар берди.
Келтирилишича, ҳолат Бош прокуратура ҳузуридаги департаментнинг Юнусобод тумани бўлими томонидан ўтказилган терговга қадар текширувда аниқланган. “Ф.А.” МЧЖ раҳбари Ж.Б. ва менежери А.А. (муқаддам судланганлар) фуқароларни гўёки Германия давлатига ишга юбориши ҳақида интернет ижтимоий тармоқларига эълонлар жойлаштирган.
Улар ушбу эълон бўйича мурожаат қилган 9 нафар фуқаро билан сохта шартномалар тузиб, улардан жами 12 500 АҚШ доллари ва 73,2 млн сўм пулларни фирибгарлик йўли билан қўлга киритган.
Мазкур ҳолат юзасидан Жиноят кодексининг 168-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Хорижда ишлаётган ўзбекистонликлар
2025 йил боши ҳолатига 1 340 000 (1,34 млн) нафар ўзбекистонлик хорижда меҳнат фаолияти билан шуғулланамоқда. Улардан 20 фоизини аёллар ташкил қилади.
Россиядаги ўзбек мигрантлар сони 2023 йил охирида тахминан 1 млн 200 минг киши эди, 2024 йил охирида эса бу рақам тахминан 698 мингга тушди, яъни Россия ҳали ҳам етакчи давлат бўлса‑да, лекин рақамлар сезиларли камайган.
Ҳукумат 2025 йилда Германия, Буюк Британия, Япония, Корея Республикаси, Канада, Исроил, Саудия Арабистони, БАА ва Польша каби иқтисоди ривожланган 21 давлатда 200 мингдан ортиқ ўзбекистонликни иш билан таъминлашни режалаштирмоқда.
Ўзбекистонликлар учун Германияга миграция масаласида бир қатор енгилликлар ишлаб чиқилмоқда. Германияда транспорт, муҳандислик соҳаларида ишлаш истагида бўлган фуқаролар ушбу давлат стандартлари асосида Камбағалликни қисқартириш ва бандлик ҳамда Транспорт вазирликлари қошидаги касбий таълим муассасаларида германиялик мутахассислар томонидан тил ва касбга ўргатилади.
Бу борада фирибгарликлар
Тошкентда фуқарони Японияга ишга жўнатиш эвазига 7,4 минг доллар олган шахс, Самарқандда тўрт кишини Польшага ишга юбориши эвазига жами 10 700 долларни фирибгарлик йўли билан қўлга киритган шахсга жиноят иши қўзғатилганди. Самарқанд, Жиззах ва Тошкентда фуқароларни хорижга ишга юборишни ваъда қилган шахслар ушланганди.
Президентнинг “Хорижда меҳнат фаолиятини амалга ошириш жараёнларини тартибга солиш бўйича қўшимча чора-тадбирлар тўғрисида”ги қарори қабул қилинган бўлиб, унга кўра 2024 йил 1 ноябрдан хорижий иш берувчилар томонидан таклиф қилинаётган иш ўринлари ҳақидаги барча маълумотлар Миграция агентлигининг электрон платформаси, ОАВ ва ижтимоий тармоқларда очиқ эълон қилиб борилади.
Изоҳ (0)